هل تصدق رواية الشرطة بأن المتهم محمد مصطفى هو بالفعل سفاح المعادى

داليا حلمى40 سنة ربة منزل
لا أعرف.. الموضوع محير.. بنسمع خبر من هنا وخبر من هناك، فى نشرة الساعة 9 تسمع تأكيدات بأنه السفاح وإذا غيرت المحطة على العاشرة مساء تلاقى الأهالى والخبراء بيشككوا فى أن الشاب الموجود ده هو السفاح.. علشان كده أنا متلخبطة.. ومش عارفة.
سليمان سكر 50 سنة سائق تاكسى
لا أعتقدأنه السفاح.. من خلال متابعتى للقضية فى الجرايد والفضائيات باحس إن المتهم مستحيل يكون السفاح، يمكن بسبب صغر سنة أو ملامح وجهه التى لا تؤهله أبدا إنه يسبب كل هذا الذعر.. هو ممكن يكون شاذ ومريض نفسى، لكنه مش السفاح.. صدقينى أنا متأكد.
مروة كمال 18 سنة خريجة معهد
لا أعرف.. أكتر حاجة غريبة فى الموضوع ده، هو إن القبض عليه اتأخر جدا.. زى مايكون كان فيه شبح وفجأة ظهر.. صحيح أنا مرتاحة وسعيدة بالقبض عليه وأتمنى أنه يكون هوه السفاح الحقيقى.. بس إجابتى على السؤال.. إنى معرفش.
عفاف 52 سنة تعمل بجامعة القاهرة
لا أعرف ..إزاى هم عاوزينا نصدق الحكاية دى، أنا مش مقتنعة بالموضوع، هو فيه سفاح كان سبب فى رعب المعادى ممكن يتقبض عليه بالطريقة دى.. عموما أنا مقدرش أقول إذا كان هو ولا لأ، بس أقدر أقول.. إن فيه إهمال من الشرطة.
حاتم 32 سنة محاسب
لا أعرف.. ليس لدى إجابة محددة.. القضية مازال التحقيق فيها مستمرا ولم تتضح أى معالم.. وأعتقد أننا لازم ننتظر قرار المباحث والقضاء بدل ما نتعب نفسنا.. بتخمينات.
صلاح عبد المجيد 54 سنة عامل نظافة
لا أعرف.. مش عارف والله.. بس الناس كلها بتقول إن السفاح ده كان أصلا إشاعة.. وأنا مش عارف إيه اللى فكرهم بيه دلوقت.. هو فيه حد سفاح ومرعب ويتمسك فجأة وبالسهولة دى.. بس يستاهل طبعا اللى يحصله لو هو السفاح.
هانى سمير محمود34 سنة مدير وإدارى
لا أعتقد أنه السفاح.. ياجماعة إنتم مشفتوش الولد.. واضح عليه إنه مريض نفسى ومتخلف عقلى، وشاب بهذه المواصفات لا يستطيع أن يرتكب جرائم بهذا الشكل ويختفى بهذه المهارة.. ربنا يستر.. السفاح الحقيقى أكيد مازال طليقا فى الشوارع.
ريهام محمد هاشم 20 سنة طالبة فى ليسانس آداب
لا اعتقد أنه السفاح.. مش ممكن أصدق كلام الشرطة، لأنه مافيش سفاح يتسبب فى كل هذا الذعر ثم يتوقف فجأة لعامين ثم يعود لممارسة جرائمه.. يعنى هو كان واخد أجازة! وحتى لو كان هو السفاح لازم نسأل نفسنا كانت فين الشرطة؟!