أمير عبد الحميد ل"اليوم السابع": توروب يشبه فايلر في الشخصية وجوزيه في الإنسانيات

أول يوم ليا كمدرب في الاهلى كأنها "ليلة العيد"
كثرة عدد أفراد الجهاز الفني للأهلى وراء رفض توروب إستمراري
قولت للشناوى هتقعد دكة ف قالى :"مصلحة الاهلى أهم"
علاقتى بالشناوى مفيهاش تفاهة ومش بشغل دماغى بالكلام الفارغ
الشناوى وشوبير قالولى لازم تكمل معانا..وزيزو خطف حب نجوم الاهلى
محاضرات عماد النحاس كأنها من زمن عظمة مانويل جوزيه
أوضة لبس الاهلى كلها "أعمال خير" وعشان كدا هيكسبوا كل البطولات
تريزيجيه قالى مش مستحمل حزن جماهير الاهلى أنا راجع عشانهم
رجعنا حمزة علاء عشان نأمن حراسة مرمى الاهلى 10 سنين
إمام عاشور راجع قريب لتدريبات الاهلى
أنا تحت أمر الاهلى في أي وقت.. يشاور بس
منذ ساعات قليلة ، وجه النادى الأهلى من خلال وليد صلاح الدين مدير الكرة بالفريق الشكر لأمير عبد الحميد مدرب حراس المرمى بعد توليه المسئولية في المرحلة المؤقتة تحت قيادة عماد النحاس قبل تولى الدنماركى ييس توروب مهمة تدريب المارد الأحمر مؤخراً
وإنضم أمير عبد الحميد لقائمة مدربى حراس المرمى في تاريخ الاهلى الذين حفروا اسمهم بأحرف من نور بعدما نجح في تعديل الدفة وتصحيح مسار الفريق الأحمر في فترة صعبة عقب توجيه الشكر للأسبانى خوسيه ريبيرو والذي تمت إقالته بسبب سوء النتائج
وحمل أمير عبد الحميد لواء المنقذ من أبناء الأهلي والتي بدأها كلاعب وأكملها كمدرب بعدما تولى المهمة في فترة حرجة ووسط ظروف صعبة برفقة جهاز عماد النحاس ليعيد الانتصارات والاستقرار لغرفة ملابس الفريق الأحمر.
"اليوم السابع" التقى أمير عبد الحميد في أول حوار عقب رحيله عن النادى الاهلى ليكشف كواليس 40 يوماً قضاها داخل القلعة الحمراء وإلى التفاصيل..
*لماذا أشعر بنبرة حزن في صوتك ؟
زعلان إنى هسيب الاهلى وأمشى..بيتى اللى كنت فرحان ومستمع لما رجعت ليه عشان أكون مدرب وشوفت فيه أيام حلوة مقدرش أنساها.
*عملت ايه لما عرفت انك هتدرب حراس الاهلى ؟
منمتش ليلتها والله كأنها ليلة العيد ..حضرت لبسى وبقيت فرحان ومش مصدق
*لماذا لم تستكمل مهمتك مع الاهلى ؟
اديت دوري على أكمل وجه وبشكر الجهاز الفني والإداري والطبى واللاعبين ومجلس الإدارة وكل من تعاملت معه طوال الفترة الماضية.. حقيقى الاهلى كبير بناسه وهيفضل كبير.
*هل رفض توروب استمرارك في جهازه المعاون ؟
بالعكس المدرب الدنماركى عملت معه عدة أيام وأثنى على أدائى في تدريب حراس الاهلى وأكد انه يرفض فقط كثرة العدد في جهازه الفني وقالى سنتعاون في المستقبل
*ماانطباعاتك عن توروب؟
مدرب متميز سواء من الناحية الإنسانية يجيد التعامل مع اللاعبين وعلى الصعيد الفني واضح أننا أمام مدرب كبير وأتمنى له التوفيق الفترة المقبلة.
*توروب يشبه مين من مدربين الاهلى الأجانب ؟
في الشخصية يشبه فايلر وفى التعامل النفسى يشبه مانويل جوزيه
*واجهت اتهامات بأنك لاتستطيع التعامل مع الشناوى بسبب قوة شخصيته ؟
اطلاقاً العلاقة بينى وبين الشناوى قائمة على الاحترام ..وأشهد الله أن كل مايقال مجرد شائعات لا أساس لها من الصحة.. رأيت وتعاملت مع أحسن حارس في أفريقيا وراجل جدع وكابتن كبير لفرقة بحجم الاهلى .. وعلى فكرة انا والشناوى مش هنبص للتفاهات دي ..دا كلام فارغ لايستحق عناء الرد.
*هل تحدث الشناوى معك للإستمرار في تدريب الاهلى ؟
الشناوى ومصطفى شوبير تحدثوا معى وكانوا يرغبون استمراري وبشكرهم على مشاعرهم
*وماذا عن العلاقة بين الشناوى ومصطفى شوبير ؟
الشناوى وشوبير أخوات بمعنى الكلمة والمشاركة حق أصيل للجهاز الفني والثنائى يتعامل باحترافية شديدة في هذه الجزئية
*كيف تعامل الشناوى مع قرار جلوسه بديلا في مباراة حرس الحدود ؟
قالى نصاً :"أهم حاجة مصلحة الاهلى".
*هل طلب وليد صلاح الدين رأيك قبل استعادة حمزة علاء ؟
طبعا وقولتله لازم يرجع ده حارس كبير ولو رجع هنبقى خلينا مركز حراسة مرمى الاهلى في أمان لمدة عشر سنين جايين
*وماذا عن سيحا؟
حارس كبير وكان متأثر نفسياً بسبب عدم المشاركة وكلمته وقولتله دورك هيجى وهتتألق .
*في مشاكل في أوضة اللبس في الاهلى ؟
اقسم بالله ماشوفت حاجة من دى.. سمعت كلام الناس ولما جيت لقيت حب واحترام وفرقة بتعمل خير بشكل جماعى وبتطلع فلوس لوجه الله وتدبح عشان العمال الغلابة وعشان كدا ربنا هيكرمهم وهياخدوا كل البطولات السنة دى
*وماذا عن زيزو ؟
لاعب كبير ومحترف ومش بتاع مشاكل عالطول ساكت ومركز في نفسه وشغله وكل اللاعيبة بتحبه .
*وماذا عن تريزيجيه ؟
شايل فرقة الاهلى على كتافه وعايز يعمل كل حاجة..وكان زعلان وقت أزمة الجمهور وقال عمري ما أغلط في جمهور الاهلى أنا راجع من الاحتراف عشانهم
*كلمنا عن عماد النحاس كمدرب ؟
كنت معاه كلاعب وكان قائد تاريخى ودى أول مرة أدرب معاه وشوفته في المحاضرات بيتكلم زى مانويل جوزيه وجدع وراجل وبتاع شغل ..التمرين 6 بليل تلاقيه في النادى من الساعة 2 الضهر وشخصيته قوية ومع ذلك كل اللاعبيه بتحبه
*طمنا على إمام عاشور ؟
راجع قريب ان شاء الله وبتكلم معاه عالطول وبيطمنى ان حالته في تحسن وباذن الله نشوفه في الملعب قريب
*ممكن نشوف أمير عبد الحميد مدرباً لحراس الاهلى مرة تانى ؟
انا تحت أمر الاهلى في أي وقت يشاور وانا أنفذ وكل التوفيق للفرقة الفترة الجاية.