من مواطن إلى سيادة الرئيس

مش منتظر منك كتير غير بس تحكمنا بضمير
وإدينى حقى بالتمام إن كان شويه أو كتير
وتخلى بالك إن أنا وسط الجيران لازم أغير
ومحبش أبقى إمعه ولا أحب إيدى مربعه
وخلى بالك إن أنا متعود إنى أكون كبير
...
مش منتظر منك كلام ولا كل يوم هجر وخصام
ولا كل يوم تكسر عنيّه أو تقول الدعم كام
ولا تفتكر أنك نبى مخلوق هدايه للانام
كل اللى عايزه إنك تكون مخلص وماشى بالقانون
والقانون ميكنش فيه فقرات تقنن الحرام
...
مش عايز أشوفك يوم بعيد بينى وبينك سور حديد
مش عايز أشوفنى لابس قديم وأشوفك أنت لابس جديد
ولا أشوف ولادى حزنانين وأشوفك انت عايش سعيد
ولا أشوف ولادك أمريكان وبيتكسوا هدوم م اليابان
ولا أشوف أخواتى فى الشوارع وأنت فى القصر البعيد
...
لو حتى موافقتش عليك ولا حتى صوتى إديته ليك
لو حتى كنت فى يوم هجيتك أو كتبت رأيى فيك
هقطع لسانى من النهارده وأنقعه فى برميل فينيك
بس أنا طلبى الوحيد إنى أعيش فى زمن جديد
ومن النهارده أنا معاك وإيديّه ممدوده لإيديك
...
وخلى بالك فيه كمان بينى وبينك الزمان
وخلى بالك إن انا لسه مكانى فى الميدان
دم الشهيد لسه هناك منشفش ولا ضاع من المكان
اللى لولا سفك دمه والدموع على خد أمه
كان زمان معالى الرئيس لسه مشرف فى اللمان