اختيارك للرئيس

شوف لمين راح تدى صوتك واسأله واسأل عليه
واعرف السى فى بتاعه وناوى يعمل بكره أيه ؟
شوفوا هايحاسب اللصوص ولا هايغمض عنيه ؟
شوف ايديه كانت نضيفه ولا فيه سرقه فى ايديه ؟
واما أكلنا عيش ودقه كان معبى كرشه أيه ؟
واما كنا فى الميدان كان مخبى نفسه ليه ؟
واما هجموا بالجمال والبهايم والبغال
قول له كنت فين ساعتها لما كنت مش لاقيه ؟
......
شوف لمين راح تدى صوتك واللى راح يستاهله مين ؟
شوف طباعُه وشوف مبادءه وشوف رصيده جه منين ؟
واعرف امه مين ابوها ؟ وامه كانت عايشه فين ؟
بص تحت الدقن حبه والذبيبه حبتين
قلّعه هدومه وياريت تنقعه فى فنيك يومين
قول له افعال اللى قبلك لسه منها قرفانين
لو لقيته مصرى زيك زى ما يكون ابن حيك
بص تانى لشكل عينه شوفه بيبحلق لفين
......
لو لقيت فى عيونه كرسى صورته فى عنين البعيد
والغرور على وشه باين للى يلمح من بعيد
اعرف انه ناوى يسرق التكيه من جديد
ناوى على سرقة مصانع السمنتو والحديد
ناوى يبقى بس هوا فى التكيه المستفيد
ناوى يحكم طول حياته والرخامه معاه تزيد
واحنا مش ناقصين مناكفه من رئيس وحكومه هايفه
احنا عايزين ننسى حبه ونبدأ العهد السعيد
......
شوف لمين راح تدى صوتك والحكايه مش دعايه
ياما شوفنا دقون وشوفنا بُسترات ملهاش نهايه
المهم اللى هايبقى قلبه مخلص من البدايه
واللى هايصون الأمانه وكل لحظه يكون معايه
واللى مصر جوه قلبه وحبها عنده هوايه
واللى ناوى يعلى بيها بالإراده لكل غايه
شوف لمين راح تدى صوتك اوعى حاجه فيه تفوتك
اختيارك للرئيس هو عنوان الحكايه
......