رباعيات

علمتنى أتكلم وكان نفسى تعلمنى السكات
أصل السكات مطلوب فى معظم الحالات
بدفع ثمن للكلمة من روحى ودمى
وياما فارس لما قال الكلمة مات
......
علمتنى أن الأمانة التزام
والرجولة بفعل مش بس بكلام
والتبن ممكن بالشكارة يوزنوه
والدهب دايما ميزانه بالجرام
......
بيعه رخيص لو اللى تبيعه مايسواش
والغالى لو يشتروه بالدنيا ماترضاش
الغالى مش هاتلاقيه لو جيت فى يوم بعته
وياما غيرك زمان دوّر عليه ملقاش
......
اسأل ضميرك إذا كل البشر أفتوك
واعمل حساب أن بكره ملايكه هايحسبوك
واعمل حساب أن فيه واحد كبير جبار
ممكن يحبك إذا أمك وأبوك حبوك
......
أجمل ما فيك أنى بحبك باختيار
فى الليل بشوفك زى فى عز النهار
يعجبنى فيك أنى بشوف وشك صريح
وأن قلبك لسه فيه الدار عمار
......
كل الصبايا فى البلد متزوقين
بس مين اللى يشوف الحُسن مين؟
ومين يشوف الطبع من خلف الزواق؟
غير اللى دايما جوه قلبه جوز عنين
......
أوعى الدموع تنزل ويلمحها الجبان
قبل ما تدمعها قوم وفضيله المكان
واديله ضهرك قبل ما يشوف دمعتك
لا أحسن يعايرك مهما طال بيك الزمان
......
قلبى وقلبك لسه قاعدين فى الميدان
مستنيين نرجع إذا غدر الزمان
وكل نقطة دم بتنادى هناك
أنا فى انتظار الثأر من دم الجبان
......
لما قابلنى فى الطريق معرفتهوش
الوشوش معدش ليه نفس الوشوش؟
الكراسى غيرت فى الناس كتير!!
واللى طلعوا لفوق خلاص مابينزلوش !!
......
ابتسم لى حتى لو فى عينيك دموع
ضحكتك ليّه ميدان مليان شموع
والشموع دايما بتبكى وهيه قايده
دمعها ونارها بيحرقوا فى الضلوع
......
ابتسملى قبل ما الدنيا تضلم
خلى بسماتك فى قلب الروح تعلم
القمر فى زمانى مابشوفهوش كتير
وابتسامتك نور أصلى عليه وأسلم
......