الوشوش

وسام صدفاوي كل الوشوش بتعوي جربت اجري علي مهلك ما انت خلصان من زمان حاجة ناقصة دايما ف قلبك المفزوع من المكان كل الوشوش قبيحة بتضحك بحاجب وسنة ومزرعة ايدين تشبه ايدين العناكب وتقول ما تخافش السكينة اللي ف ايدي
سكينة مسنة
ماتقواش ع الكوي
كل الوشوش جايالي في المنام
ولازم تقف قدامها ثابت
جايز ترتاح م التار البايت
اللي انا مش شايفه كويس
بفعل الكابوس
والشبورة
لكن حاسس بيه
زي ما انا حاسس
بوزني الزايد
وسناني المكسورة
كل الوشوش سرها باتع
وقت النكبة تواسيك
وتلم النقوط
وتبارك فيك
وتقول لك
الدم اللي ف ايدي ده حنة
كل الوشوش بتترعش وسخنة
متجمعه وساندة ع الشلته
قدامي
وكأني في مشهد فصامي
كل الوشوش خلفي وامامي
هاوية شفط الاوكسجين
وعامله وشي زووم
وان ضاق نفسك اكثر
ترقيك بعروسه بعين واحدة
تشبه للبوم
كل الوشوش داخله جوه النص
الل انت مخبيه طول الوقت
زي ما انت مخبي العجز
ومقنفد ع الكرسي
م الخوف والسقعة
كل الوشوش
بتعوي