من وحى الثورة

هو دا شرع السما.. هو دا عدل الإله.. اللى يهدر دم شعبه.. نسجنه ونفضل وراه.. لما حكم العدل يصدر.. كلنا واقفين معاه.. واللى يسرق منى قوتى.. مش رايدلى الحياة.. ناخده منه ومن عياله.. للجواعى اليتامى الحفاه.. يوم تنحى كسرنا قلة.. ويوم هتحكم هفدى شاه.. هو دا شرع السما.. دا بصحيح عدل الإله!
سامح لطف الله
داروا الوشوش
ياللى كنتوا زمان ما بتختشوش.. داروا الوشوش.. وهاتوا كمان الناس عنكوا تحوش.. داروا الوشوش.. يااللى خلاكوا المال مسعورين زى الوحوش.. داروا الوشوش.. ياللى نهبتوا خير البلد وماخلتوش.. داروا الوشوش.. يااللى سرقتونى أنا والولد وماكفكوش.. داروا الوشوش.. يااللى كنتوا زمان تخافوا ما تختشوش!
رامى محمد زين
ورد مصر
قبل ما يهل ربيع الورد.. وردك طرح فجأة يا مصر.. ياسمين وفل عطر مالوش حصر.. ويا دوبك الشعب صلى العصر.. سمع الشباب بكل قوة يدقوا أجراس النصر.. الشعب حضن الشباب وعزولهم مقهور قهر.. إيد واحدة وقوة قوية وسجنوا سكان القصر.. أصلهم ناس ظلمة وكل وعودهم كدب وفشر.. والحمد لله انتصرنا وحقنا رجع بكل فخر.
عزيزة غيث
هدوم بيضة
لو شفت واحد فى حفلة بدلته بيضة.. وكل ليلة يبلبع فى العشا بيضة.. قوله دا فالهم وحش، والآخره مش بيضة.. دا اللبس جوه طره دايما هدوم بيضة.
د. توفيق ماضى
الرضا نور
الرضا نور فى وجه المتقين.. ما أجمل انتظار رزق رب العالمين.. مهما طال لا يهتز قلب الموقنين.. من أجر عظيم وعد به الصابرين.
محمود كرم الدين محمود
أقسم بالله العظيم
أقسم بالله العظيم.. أنا المصرى الكريم.. المؤمن بالله الرحمن الرحيم.. أن أقوم بعملى بشكل سليم.. فلا أدخل على أسرتى إلا المال الحلال.. ولا أكون سبباً للفتنة والقيل والقال.. ولا أزرع الخوف فى قلوب النساء والأطفال.. ولا أوذى غيرى باليد أو بالمقال.. ولا أحول بلدى إلى أفغانستان أو الصومال.. ولا لأى بلد من بلاد الحرب والأدغال.. وأن يكون العلم رسالتى فى سائر الأحوال.. وأن أعلو باقتصادها فى السهول والجبال.. لأن مصر دائماً كانت بلد الأبطال.
د.صبرى إسماعيل
ما أعدلك!
يا ربنا ما أعدلك.. الأمر لك.. والحكم لك.. والملك لك.. تؤتيه من شئت وإن لم يسألك.. وإذا تألّه أو تناسى جائر.. فى بعض طرف العين تنزع ما ملك.. سبحانك الفرد الملك.. رب الممالك والفلك.
دكتور. إبراهيم طالب عيسى