أهى حكمت المحكمة

آهى حكمت المحكمة على لجنة الدستور
وعرفنا مين اللى كان فى المجلسين مغرور
واللى افتكرناه هايبقى شيخ وحقانى
طلع بشحمه ولحمه هو (فتحى سرور)
......
اهى حكمت المحكمة وانكشف المستور
فى اللجنة طلع "الكتاتنى" وغيره مالهوش دور
وقولوله عيب تبقى راجل شهم كُباره
وتلبس الشعب حدوه وبردعه وطرطور
......
اهى حكمت المحكمة وبرضه هايستأنف
لما الحكايه بقت بايخه وكمان تقرف
حد يقول للكتاتنى فى ودنه مايصحش
وارضى بحكم القانون من قبل ما تصيّف
......
اهى حكمت المحكمه وابو دقن بيكابر
ولأمتى هافضل كده على غُلبهم صابر ؟
خايف اشك فى ايمان الاخوه وسلوكهم
واسحب كمان الثقه من "سعد" و" الشاطر"
......
اهى حكمت المحكمه يا اخونا فاضل أيه ؟
ومين كبيركم عشان نعرف نرد عليه
ولا اللى دقنه كبيره يبقى مالهش كبير
ويبقى كل البلد على بعضها فى ايديه
......
فوضت امرى لربى وربكم فيكم
وداعيته عند الحرم بهدايته يهديكم
وفى ساحة السيده فرقت فول نابت
وداعيت فى سيدنا الحُسين تعمر على ايديكم
......
يا المجلس العسكرى حضرة سيادتك فين
ما تعدل انت وشوف الماده رقم ستين
وخلى واحد فقيه دستورى يشرحها
لا احسن معالى الشيوخ فى اللجنة مش فاهمين
......