حتة من مصر

أنا مصرى زيى زيك تمام
عايش ف مصر معاك من زمان
عايش حياه غير آدمية
على الرغم إنى مثبوت فى الورق إنسان
ف وسط الزبالة والمجارى بنام
ف أوضه أنا وسته غيرى كمان
وكل يوم الصبح بقف طابور
مستنى دورى عشان أدخل الحمام
بصرف من دخل شهرى زى كتير محدود
وعايش أنا وأهلى مع التعابين والدود
بحالى الحكومه كانت عارفه لكنى من حساباتها
كنت متشال وكأنى ماليش وجود
لا فى ميه ف بيتى ولا كهربا
وعفشى يادوب حصيرة وبوتجاز ومصطبة
وعلى الرغم إن حالى يصعب ع الكافر
إلا إن الحكومه ماكنتش من حالى مستغربة
عايش تحت الأرض وتحت خط الفقر
مسروقه منى حقوقى عايش ف ذل وقهر
بضّرب كتير على بطنى إكمنى فى بلدى
عايش غلبان ضعيف ماليش سند ولا ضهر
أنا كل اللى عايزة من بلدى الإهتمام
شقه تتاوينى أنا وعيالى والمدام
كل اللى عايزه إنى أتعامل فى بلدى
زى ماانا مثبوت ف الورق إنسان.