اللى اختشوا ماتوا

بيقولك اللى اختشوا ماتوا والدم هرب م العيشين
واترشح لرياسة الدوله عواجيز اعمارهم سبعين
وفوق السبعين بكمان حبه قال يعنى مافيش قيادات شابه
وعجزنا نلاقى زى "أوباما" و"ساركوزى" نجيب زيه منين؟
......
بيقولك عايزن حُكام من فرقة توت عنخ آمون
رخصتهم مسحوبه علشان تركيزهم شىء مش مضمون
اعراض الشيخوخه عليهم باينه وملحوظه فى عنيهم
بالكاد راح يعرفوا أساميهم دابغين الجلد وصابغين
......
بيقولك هايجيبوا رئيس زى المخلوع كان امريكى
ومقارب من عجل آبيس وبيمضى ويختم توماتيكى
وصديق لأوباما وكوهين وبيكره أحمد وحسين
وحبيب لأدارة صهيون ويقولها شوبيكى لوبيكى
......
بيقولك عايزين الريس اخوانى ويكون م العسكر
ويكون مناخيره مكسوره وبيمضى من غير ما يفكر
ويطنش على رد المال ويسامح الفعل البطال
ويكون من جيش حتشبسوت ويحب يصيد فى المتعكر
......
بيقولك هايجيبوا رئيس بيقولوا ويمكن مايجيش
ونعيش فى نظام المخلوع مع باقى رجالته الالاضيش
والثوره خلاص سُك عليها واديها كلبشات فى ايديها
بيقولك هايماطلوا الناس وهانشبع منهم طلطيش
......
بيقولك يا نعيدوا الثوره يانعيدوا "حسنى" وايامه
ويا نقطعوا ايد الحراميه يا "معاوية"هايرجع بنظامه
واهى عدت سنه مع شهرين واديكوا بعنيكم شايفين
الثوره اتسرقت والسارق هايسوق الثوار قدامه
......
ياما نفسى أشوف مشنقه عاليه وفى وسط ميدان التحرير
متعلق فيها الحراميه ولصوص كانوا مع "حسنى" كتير
يا نلبس رجالة الثورة الحدوه ودستة طراطير
وانا هالبس بردعه قدامهم والبس طرطور ذره كبير
......