أماني سعيد محفوظ تكتب: ساعة تروح.. وساعة تيجي

أول ساعة..
تيك .. توك .. تيك .. توك
قاعد جوه الشاشة يلوك
فلّق دماغنا ده شئ بالساهل
تبات جماد تصبح شئ سائل
فوق البرج العاج متتنك
وكلامه حلو.. كلامه يبَنج
طول ما الدم ف وشه يبوك
تيك .. تَك .. تيك .. توك
الساعة التانية..
عدت سنة أولي وسنة تانية
والخير زايد
إغرف .. إلهط .. إياك تغلط
وإياك باللي بتاخده .. تزايد
خليك لابِد .. عَشِش فيها
وان جيت تخرج .. بوس ف ايديها
مهو لولا إيدها سِهِت عنك
كان عمرك ما كبرت .. عليها
الساعة التالتة مش تابتة..
تَك .. تيك .. تَك .. تيك
الغلط محتاج تكتيك
إفعل إنت ما ف ضميرك
واستنتج اللي حيأتيك
أنا لا ببستف .. ولا حتأسف
بكره حتعرف شكل مصيرك
لما تنادي تقول يا فاكيك
إقلع خيشك .. إنفش ريشك
ف المجاري إنت ديك
مرة تدي .. وعشرة ليك
الساعة الرابعة والخامسة..
جره وراها سِتة وسَبَعة
سبع وسبعة
شُجاع وشُجاعة
خُد كام قفا .. خُش البلاعة
كف إيديّه كما الولاعة
زي شعاع الشمس ما يلسع
قلمي بيسمع بالسماعة
إيه يا جماعة .. ده وقت مظاهرة
جوه الكوكب صبحت ظاهرة
بس كفاية .. فرش ملاية
خراطيش دمكوا .. تملا دواية
تحت مداسي .. إنتوا دوايا
تمانية وتسعة .. أديها بتسعي..
تيكي .. تيكي
زي ما رحتي .. زي ما تيجي
كده شوبيكي .. كده لوبيكي
أأمري بس .. انا مِلك إيديكي
سُلطة .. سَلطة .. أو كام خرطة
كل الخارطة .. ما تغلا عليكي
واحذري غضبي .. ده تمنه .. عنيكي
عشرة .. حِداشر وكمان نُص..
دَوَر عينك .. لما تبص
إعمل نايم .. سيبني أقص
قُص النُص .. حيصبح نُص
نُص عشاني .. ونَص عشاني
واحنا عشانا حتعمل إيه؟
بعد الصمت .. سمعنا الصمت
قصوا عشمنا لما قِرفنا
ولما عِرفنا عشانا .. فيه إيه
بعد النُص تدق إتناشر ..
تن .. تن
الساعات ع الحيط .. ترن
بس الصوت الخارج مني
لما بأن ..
مغطي عليها
ولما أون ..
تغطي عنيها
رِن .. رِن
ع الوشوش وحوش ترن
ف الودان كلام .. يزن
شئ غريب يزحف كأن
النهاية .. مش كفايه
أهي بتأدن ..
يا ابن بطني .. لو تحن
اللي راكبك إسمه جن
يا مركوب لازم تاخد بالمركوب
مدام بتطاطي
واللي يهمك عند الحاتي
عايش فردي بشكل أُحادي
سيب عقاربها بدورها تنادي
حادي .. بادي .. ماكولشِ إلا ادي
عندي باروكه بمليون شعره
تزيد ع الهادي
ولما تعلّم واحده ونُص
إعلمي إننا بنموت فيكي
إتحزمي واِديها بسَعرة
تيكي .. تيكي
زي ما باخد .. مش بديكي
تيكي .. تيكي
ساعته تروح
وساعتي حتيجي
الساعةُ الأن الثانية عشر إلا إثني عشرة ساعة
حسب التوقيت المحلي لمدينتنا القااااهرة