ياما نفسى ترجع أيام المدارس

وأرجع من تانى دارس
وأقعد ع التخته وأخد مصروف
ولا أشيل مسئوليه ولا أبقى بيها حاسس
ياما نفسى ترجع أيام الدراسة
وأشيل تانى شنطه فيها كشكول وكراسة
وكتاب وزارة ما يتفهمش
وأرجع أشترى سلاح التلميذ عشان أخد منه الخلاصة
ياما نفسى أرجع ألبس مريلة
وأروّح بيها البيت آخر بهدلة
من كتر اللعب والتنطيط
وماما تقولى فداك مش مشكلة
ياما نفسى أرجع أقف طابور
والصبح أحيى العلم وأنا فخور
إنى مصرى وف الفسحة ألعب مع أصحابى
فتّحى ياوردة ونعمل دايرة وندور
ياما نفسى أرجع أكتب بالطباشير ع السبورة
وأحل مسألة صعبة كتير كأنها فزورة
وبعد ما أحلّها الفصل كله يسقفلى
والميس تقولى جدع شطورة
ياما نفسى أرجع أشترى م الكانتين
كاراتيه وشيبسى ومصاصة ومندولين
وآخر اليوم أشترى حرنكش ودوم
م الناس اللى قدام باب المدرسة واقفين
ياما نفسى ترجع أيام المدارس
ماكنتش أياميها بحاجة حاسس
لا مسئولية ولا مصاريف
ماكنش فيه شىء عليّا خاسس.