بحبك يا بلدى

نفسى الثورة تتحول لاقتراحات وحلول.. وإيد شغالة بتبنى ف بشر وعقول.. وأطفال رافعة إديها للسما نفسها للشمس تطول.. وعلم بلدى يرفرف ف كل مجال ويقول.. دول اللى اشتغلو بجد.. ما قدرش يسبقهم حد.. تلقاهم ف العلوم والفن والرياضة.. فين ما تبص تلاقى الإيد شغالة.. مفيهومش حرامى ولا حد عايش عالة.. ولا حد مظلوم وراضى باستكانة.. ولا حد تايه بيدور على أكله ف الزبالة..
ناسنا اللى ضربوا المثل بالعزة والكرامة .. مارضيوش بالذل ولا الجبن ولا الإهانة.. ف الخوف وقفوا زى الأسود رجالة.. يحموا البيوت.. مارضيوش بالسكوت.. عرفوا الدنيا أنهم مش شباب المخدرات.. ولا معاكسة البنات.. دول اللى حققوا أصعب الأمنيات .. ما يحلموش ليه بباقى الحاجات؟ ..
ببلد فيها راية الحق ما تتهزش .. وشعب عزيز ما يتذلش.. والحلال ممكن ويكفى ويفيض.. مش محتاج لرشوة من زيد ولا عبيد.. فيها الحق يتاخد بالقانون مش بلوى الإيد.. مفيهاش الشريف غبى ولا عبيط.. ولا المنافق والفاسد مشهور وقدوة.. يبدأ كلامه بحكمة وينهيها بغنوة.. وفاكر نفسه مخبى أعماله السودة البلوة.. إيه يعنى لما نحلم ببلدنا فرحانة وحلوة.. مفيهاش للغباء والجهل نفوذ وسطوة.. إيه يعنى لما الفقير يحلم بمرتبه يجيب شقة.. مش بالفهلوة والسرقة..
إيه يعنى لما نفتح أبوابنا للتوبة.. مش كل الناس مجرمين.. كان فيه ناس مغصوبة.. لسه متعودين ع الخوف.. خايفين م الظروف.. مش مصدقين الحكاية.. شايفين نفس الوشوش ف المراية.. مش مصدقين انها ممكن تتغير.. مش مصدقين إن ممكن الحلم يتطور.. فاكرين اللى بيحاول يصلح مجنون بيتهور.. مهما رفع راسه مسيرة ف يوم ها يتعور.. مش مصدقين إن دعوة المظلوم ليها يوم وتتحقق.. وإن الناس ف لحظة تقوم وكلامها يتصدق..
ياه لما يبقى جواك حلم خايف يطلع.. يفضل جواك لحد ما تنسى إنه موجود.. لما تعيش عمرك ف نفس الحدود.. ما رسمتهاش.. تشتغل شغلة ما اخترتهاش.. لما تصدق إنك ناجح مع إنك ما تعلمتش.. وتصدق إنك فرحان وانت لسه مافرحتش.. وتصدق إنك فاهم وانت لسه معرفتش.. وتبص لنفسك وتسأل إنت عايش ولا لسه ماعيشتش؟!!
لما الخوف يدخل ف كل شيء جواك.. لما عقلك يخاف م السؤال.. وإيدك تخاف م التجربة.. وقلبك يخاف م الحب.. وعيشتك كلها كدب خايفه تقول الصدق.. يبقى فاضل ايه تقابل بيه الصدق لما ييجى لك.. وهاتعرفه ازاى وانت قلبك وأيامك بيلوموا سنينك.. لازم الحلم يهرب من بين الخوف.. ونحققه رغم يأس الظروف.. ونقول بحبك يا بلدى من غير خجل أو كسوف.. مش مهم كنت ايه ولا ايه غلطاتك.. المهم تفوق لنفسك وتعوض اللى فاتك.. كنت بلطجى أو مرتشى أو ديل لسيادته.. يله قولها بشجاعة اكشف عن حقيقته.. تلقى حلمك حقيقة وخطوتك عرفت بدايته.