سيادة المشير: قليلا من العصا.. كفاية جزر

أحنا عيلة ليها جذور فى كل حتة، زى ما بيقولوا كده، عاملين زى الشجرة المتفرعة.. بس أهم فرعين فيها موجودين فى مصر وطنطا...( على فكرة أحنا دايما نقول "مصر" على "القاهرة".
ويمكن ظروف دراستى أنا وأخويا فى جامعة القاهرة، وبحكم شغل والدى، فأحنا باستمرار مسافرين مابين طنطا والقاهرة...
وبنعشق حاجة اسمها سفر بالليل، زى ما بيقولوا كده الدنيا بتبقى هادية، والطريق فاضى والبلطجية على ودنه:
بس أحنا بنصلى الفجر ونتوكل على الله...
بس بقالنا كده فترة.... وأحنا فى طريقنا للقاهرة.. تفاجأ باللى يقولك.. حاسب.. دا قرية فلان عاملة اعتصام، وقال أيه قافلين الطريق وعاوزين مطبات، أو قرية علان عاملة برضه اعتصام، بس عاوزين نفق، مرة " أبومشهور"، ومرة " عرب الرمل"، ومرة ومرة ومرات، وأحنا ونصيبنا!!!!
طيب بعدين فى الناس اللى وراها مصالح دى، والناس اللى تعبانه واللى عطشان، واللى جعان، واللى، واللى، واللى!!!
طيب يرضى ربنا، أن واحد يقعد يدور على دورة مياه لوالدته ..الست الكبيرة المسنة المريضة بالسكر ............ يعنى خلاص، حبكت مطالب المطبات والأنفاق فى أنصاص الليل.
الغريب فى الأمر إن أهالى قرية" عرب الرمل" وهى من القرى التى قطعت الطريق منذ يومين فقط كانوا قد قاموا بنفس الاعتصام منذ أربع أو خمس سنوات للمطالبة بكوبرى لعبور المشاة، واستجابت الحكومة وتم إنشاء الكوبرى فى حينه، واليوم يكررونها ويطالبون هذه المره بنفق، ولما تسألهم عن الكوبرى، يقولولك أصل الكوبرى عال وعاوز صحة وعافية............ تقول ايييييييييييييييه .... اللى يلاقى الدلع ومايتدلعش .................
الغريب فى الأمر أيضا أن والدى – بحكم كونه ضابطا سابقا بالقوات المسلحة – طالما حكى لى عن سيادة المشير واستخدامه المتكرر لمثال "العصا والجزرة" كمرادف "للثواب والعقاب" أو كمرادف "للترغيب والترهيب"، إلا أن والدى غالبا ماكان يضيف: ولكنه نادرا ما كان يستخدم الجزرة........ لكن اللى أنا شايفاه – ومخلينى مستغربه – إنه منذ قيام ثورة 25 يناير المجيدة، بدأت موجة متواصلة من الاحتجاجات والاعتصامات الفئوية وقطع الطرق المتكرر، وأنا والله العظيم شايفه إن الناس عندها حق، من كتر القهر والظلم اللى اتعرضوا ليه طوال ثلاثين سنة، بس فيه حقوق ماينفعش تتاخد كلها مرة واحدة ووقت واحد، وعلشان أوضح اكتر عاوزه حد يجاوبنى: هل فيه بنك فى العالم عنده القدرة أنه يسلم كل عملائه، كل مدخراتهم وأموالهم، إذا طلبوها خلال أسبوع مثلا؟ بالطبع لا، رغم أنها أموالهم وحقوقهم........ ودا نفس الوضع بالنسبة للحكومة حتى لو هى مقتنعة بعدالة حقوقهم، وهى فعلا مقتنعة، علشان كده اللى مستغرباه إن فيه وقت من الأوقات بتفرض العصاية نفسها، سواء بالتلويح أو بالتلميح أو حتى باللسوعة، أما إن تكون البلد حالها واقف، والناس مصالحها مابتتحركش، والبورصة جايبة الناس ورا، ورغم دا كله نقضيها جزر فى جزر، أعتقد إن دا شىء مايرضيش ربنا.
سيادة المشير: يحضرنى مشهد سينمائى مرح للراحل الجميل علاء ولى الدين عندما يستجدى أحد مفتولى العضلات ليتوقف عن ضربه قائلا: كابتن، كابتن، هو كله ضرب ضرب، مفيش شتيمة، وأنا بدورى استجدى سيادتكم – وأعلم كم وحجم المسئولية الملقاة على عاتقكم فى تلك الظروف العصيبة – أعانكم الله عليها، وأقول لكم:
"هو كله جزر جزر، مفيش عصاية.......
سيادة المشير طنطاوى: قليلا من العصا... كفاية جزر
ابنتكم
مريم كشك