عمرو أديب: إعداد إصابات كورونا بتزيد لكن حتى الآن وضعنا جيد

علق الإعلامي عمرو أديب، على بيان وزارة الصحة المتعلق بعدد حالات الإصابات بفيروس كورونا المستجد، وقال: "مصر سجلت 1000 في 51 يوما، ووصلنا للألف التانية في 8 أيام، والألف التالتة في 6 أيام بس، والرسم البياني بتاع العشرة أيام الأخيرة مرعب الحقيقة، والموضوع لا يبشر بالخير خالص، تفتكروا من هنا ليوم 30 أبريل هنبقى عملنا كام حالة، بصوا بصة للأرقام يمكن تعرفوا حجم اللي احنا فيه".
وأضاف الإعلامي عمرو أديب خلال برنامج "الحكاية" الذي يذاع على قناة mbc مصر: "لو قارنا نسبة الوفيات بالإصابات هتلاقي النسبة مش قليلة، لكن مفيش قفزات كبيرة في نسب الوفيات، والأرقام ال3 بتوع مدة انتشار الفيروس لازم ناخد بالنا منها، وأغلب دول العالم اللي فيها أرقام كبيرة، هي دلوقتي بتحاول تنزل، لكن دول زي سنغافورة، فتحت الدنيا، والدنيا رجعت تمشي انهاردة عاملة فوق ال900 إصابة".
وقال عمرو أديب: "ساعات بتشوف دول انهاردة 300 و400 بكرة تبقى 800، لكن لو مشينا بالوتيرة دي هتوصل على يوم 30 أبريل ل7000 مصاب مثلا، وترامب كان بيقول إحنا ما بين 100 ألف ل200 ألف وفاة، إمبارح أعلن أن مش هتزيد عن 65 ألف، وأنت لغاية دلوقتي ماشي بنسب جيدة، لكن الإيقاع بيعلى".
وأضاف: "في 3 سيدات توافهم الله في قرية في البحيرة بعد ما جالهم كورونا، نزلوا راحوا خطوبة رجعوا بالفيروس، وده اللى بيخوفنا من التجمعات يا جماعة، أرجوكم خدوا بالكم جدا".