اختبار رمضانى

اختر الإجابات الصحيحة من بين الأقواس: النور بينقطع يوميا (بيوفروا النور للفوانيس - عشان تحمد ربنا على نعمة وجود الكهربا وهذا يقربك من الله أكثر - عشان تعرف أن النعمة ما بتدومش).
بلاليع البلد كلها مكتومة (الناس بتاكل اكتر عشان محرومين طول اليوم - العمر الافتراضى للبلاليع بيخلص ف نفس الميعاد - الناس بتحوش الأكل فى معدتهم وطريقهم سالك).
كل المحلات زحمة مووووت (الفلوس فى البلد كثيرة – عاملين جمعيه مخصوص اسمها جمعية رمضان – جات لهم علاوة تشجيعية).
مافيش حاجة على أرفف محلات الأكل: لا زبادى ولا لبن ولا حلويات ولا عصير ولا لحمة والخضار كله مضروب (بيحوشوا الأكل برضه - الأكل رخيص وزى الفل - كل الناس بتاكل كويس فى رمضان).
كل حاجة سعرها بيغلى (قلنا واخدين علاوة أو عاملين جمعية – النجار عايزين يعيدوا – موسم وصاحبه غايب).
كل الميكروباصات والتكاتك مشغلة شرايط قرآن بدل شرايط البانجو (تقوى وإيمان – البانجو حرام فى رمضان حتى لو ف أغنية – خايفين يتقفشوا بالشرايط).
عصبية الناس بتزيد فى نهار رمضان (عشان مافيش سجاير مع إن فيه واحد حلل السجاير فى نهار رمضان – عشان مافيش شاى يوزن الدماغ – عشطانين).
ريحة البانجو مهفهفة طول الليل (عشان مافيش بانجو الصبح – الصيام خلص والبانجو مش حرام بالليل – لوزن الدماغ لزوم الصيام تانى يوم)
مدرسين الدروس الخصوصية مصممين على بدء الدروس فى رمضان (عايزين يعيدوا بفلوس الأهالى – المناهج صعبة وطويلة ومحتاجة وقت عشان بتوع أولى ابتدائى – العلم لا يكيل بالبتنجان يا حجة)
الشوارع زحمة لدرجة مش عارفين نمشى على رجيلنا من قبل رمضان بأسبوعين (ماسورة بنى آدمين ضربت – الناس نايمه طول النهار وبتشوف مصالحها بالليل – وانتى مالك انتى).
مسلسلات السنة دى بايخه كلها (مقصودة طبعا عشان الإخوان ينبسطوا بالناس اللى مش متابعه حاجه مضطره تنزل تصلى – مافيش فلوس لمسلسلات كويسه عشان الفقى مشى – كل الممثلين الفلول قعدوا ف بيوتهم ومش فاضل غير دول).