رامى محمد زين يكتب: من خرج من داره.. اتقل مقداره

لقيت البلد مليانة بطالة.. والعملية مش نقصانى.. وكل ما أحط فلوس ف الحصالة.. الأسعار الغالية تخلصهالى.. وبقت ما بتكفنيش المهية.. قلت ما بدهاش لازم أشوفلى سفرية..
بس أسافر بالطريقة الشرعية.. وبسرعة رحت مصلحة الجوازات المصرية.. ووقفت فى الطابور.. وخلصت كل الإجراءات الروتينية.. وطلعت الباسبور.. قولت بعدها أدور لى على سمسار.. يشوف لى عقد فى دولة بس بتدفع بالدولار.. ولقيت سمسار قالى سيبك من الدول
الأجنبية.. وهسفرك سفرية عال.. إيه رأيك تروح السعودية.. وهتقبض هناك بالريال..
قولتله المدور إللى بنديه للعيال.. ده مالوش قيمة فى مصر.. قاللى فهمتنى غلط تانى قيمته جنيه مصرى وكسر.. وقاللى كمان البلد هناك أمان.. بس خلى بالك من ارتفاع الحرارة..
والمصريين فى كل مكان.. ولو حصلك حاجة روح للسفارة.. أخدت عقد العمل من السمسار..
وتانى يوم طلعت ع المطار.. ولما وصلت السعودية.. قابلت الكفيل.. لقيت المهية مش إللى هيه.. وصاحب الشغل طلع بخيل.. وكان بيعاملنى معاملة العبيد.. قلت مفيش غير السفاره هتجبلى حقى أكيد.. رحت السفارة واشتكيت.. قالولى يا تحل مشاكلك مع الكفيل.. يا ترجع زى ما جيت.. ورجعت للكفيل تانى وافترى عليا.. وسرق أوراقى وآذانى.
وبعديها اتقبض عليا.. وبسرعة على مصر رحلونى.. من غير ما آخد حتى هدومى..
والقرشين إللى معايا طاروا.. صحيح يا ولاد صدق إللى قال.. من خرج من داره اتقل مقداره حتى لو راح دولة بتدفع بالريال.