مبارك يعظ!

عزيزى الرئيس المنتظر
إليك أقدم خلاصة الخلاصة، وعصير فكرى المعتق آخر تلت ست حاجات، و ده لو حضرتك عايز تخلع من الكرسى بدون قلة قيمة، أو جرس وفضايح وضرب وشتيمة.
من البداية لازم تعرف إن كل أول وليه آخر، يعنى مهما حكمت هيجى يوم تودع وتتاخر.. لو مش بمزاجك هيبقى بالجزمة، إذا يومين واخلع، أحسن الشعب يطلع.. يصطادك بالشبشب من على الحيطة كما أجدعها صرصار، ولا مؤاخذة!
وأكيد سيادتك متجوز، فلو أم العيال بتبوز.. خيالها واسع وبتحلم تفضل فى القصر وتكوش.. طلقها واتجوز.. شوفلك واحدة تانية ترضى بقليله، حتى ولو كانت أم لولو.. وفهمها إنكم ضيوف عليها، مش أصحاب بلد تشتروا وتبيعوا فيها.
وإذا كنت أبو العيال هاتلك شيال..آه شيال يعينك على تربيتهم رباية صح الصح، والواد إللى يغلط إديله على عينه.. اكسر له ضلع تحمى ضلعك أنت م الكسر، و إللى يطلب منهم عربية ولا قصر.. طرقعله م الصبح لحد العصر.
وإذا يوم جالك صاحب معرض سيارات ولا حتى طيارات أو عبارات، وقالك البيه الصغير عايز يشاركنى بالعافية ماتقولوش "وماله ده زى ابنك".. حط ابنك فى أوضة الفيران وقوله "ده كان زمان يا حصان" هو المفروض "حمار" بس معلهش القافية تحكم!
عزيزى رئيس مصر إللى جاى..
ماتصاحبش فى يوم "نظيف ولا عبيد أو سالم وشريف" ما تأمنش ل"عزمى أو سرور".. وأوعى ابنك فى يوم "يصاحب" عز ولا كمال دول ناس سو يشفطوا دم الغلابة بأرخص شاليموه من كاس الوطن المعصور فى خمارة ولاد ال...
أوعاك فى يوم تطلع عبيط وتصدق أمريكانى فى البيت الأبيض بيحكم بشرع "كوهين" يقولك سلام يطلع كمين!
اسماعيل
شعبك هو سيدك.. لو تطيعوا تملك يمينك, وان يوم عاصيته.. تطلع عينك, وتسير عبد لكل كلب.. مرسوم على ديله نجمه زرقا بحبر كوبيه.. كوبيه زى عيشتك يا عم.. ولو كنت ساكن قصر, أو بتقضى آخر أيامك فى شرم.
شعبك لو يوم تجوعه..يكلك..يكرهك.. ويلعن أبو خاش أهلك.. ما تأخذوش أصل الجوع كافر, والناس عايشة تعافر.. بتعافر علشان تعيش.. و أنت مفيش.. لا سكر, ولا عربدة, و نسوان وحشيش..انسى مخدات الريش والبقشيش و التقفيش, لا تروح ماتجيش.. يا حللو!
عزيزى ساكن القصر الجديد..
السجن للجدعان و الأعيان والحكام و اللعيبة و الهليبة.. البيه أبو بدلة و إللى راسم على قورته زبيبة, أو حاطط فى ودنه دبلة.. يمكن ف يوم تبقى من سكان "أراميدان".. مطلوب للعدالة, مستنى المشنقة المنصوبة, وعينيك معصوبة..اصل الطوبة دايما تيجى فى المعطوبة!
إبنيلك فى السجن "كنيف" شيك ولطيف.. ريحته حلوة واسع و"نضيف" يمكن.. بقول يعنى يمكن.. تكون زميل عز وسرور والشريف.
فتح و دانك قبل عينيك..اسمع صوت الحق وقول شبيك لبيك, لو دولة الظلم ساعة دولة الحق ساعة ويوم وشهر و لحد يوم الساعة.
عزيزى الحاكم بأمره..
قول ل "حبيبك" الجديد ما يحكمشى الناس بالنار والحديد.. والقهر والتهديد.. دا الشاب شاب والشعب جاب.. جاب ولد عترة ما يخافشى من هوهوة الكلاب..رابض فى الميدان ويا أهله.. فاتح للموت صدره.. وعينيه بالشوق بتلمع.
عسكر فى المعسكر.. أمنك طول الليل بيسكر.. من عرق الغلابة يشرب و يضرب..يحبس ويسجن.. يقتل ويسحل.. وسيادتك أعمى و أطرش.. لو صوت قنابل ما تسمع.
عزيزى صاحب الصولجان..
الملك لصاحب الملك مش لإنس ولا جان.. اجمع دهب وياقوت ومرجان, و انسى إنك إنسان.. مخلوق ضعيف وجبان.. لو يوم أتملى الميدان أصبح سيادتك فى خبر كان.