ثورة الشباب إلى أين؟

تحليلات ومناقشات
ثرثرة فوق الشاشات
والفتاوى مطره نازله
عن حلول للمشكلات
والجرايد قاعده تنشر
عن بلاوى عصر فات
والفلول فى السر تلعب
والعساكر فى سبات
والمطالب فى ازدياد
والجميع بيقولوا هات
والعداله يا ناس بطيئه
زى مشى السلحفات
إمتى حتبان الأمور
بالتزام الواجبات
والقانون يسرى علينا
بدون مماحكه وتلكيكات
إمتى راح نبنى بلدنا
إمتى يخضرّ النبات
إمتى حتدور التروس
فى العنابر والصالات
إمتى رأس الحزب ييجى
يحكى عن كل اللى فات
والجميع ينظر ويسمع
عن بلاوى وإفسادات
إمتى راح نكتب شهادة
بإن حزبه الوثنى مات
والوجوه الشابة تظهر
لأجل تعويض اللى فات
والعجايز والكهول
للحفيد يحكوا حكايات
يتركوا الفرصة لشبابنا
يصنعوا المجد بثبات
آااه يا خوفى نقولوا بكره
بعد إيه دا القطر فات
.............