فتح عينك بص كويس

واعرف مين راح ينفع ريس
ويكون ناوى يحكم مده وميقعدش سنين ويغلس
ويكون راجل عال العال ومعندوش (سوزى) و(جمال)
ولا هايوّرث ولا هايدلس ولا يقعد فى الكرسى متيس
......
فتح عينك وافتح بقك واطلب دايما بالزوق حقك
اوعى شاويش يلعب فى قفاك ولا تروح القسم يزقك
اوعى تشوف العيب وتطنش ولا تنام وتقول مأظنش
إن الحاكم ممكن يسرق ويشد اللقمه اللى فى بقك
......
فتح عينك واعرف صوتك راح يتحط فى قايمة مين
مين الأولى ومين الأصلح واللى يكون مخلص وامين
ويكون قانع مش طماع ويكون وقت الجد شُجاع
ميوطيش لشميل وكوهين ويحاصر أهل فلسطين
......
فتح عينك وارفع أيدك وارفع صوتك فى التحرير
وارفع علم الشعب المصرى وخليك مؤمن بالتغيير
حاسب الحاكم بالسحتوت متخلهش بقرش يفوت
وإذا باع أرضك اقطع إيده خليه يزرع فيها شعير
......
فتح عينك للى هايمسك أى وزاره من الوزارات
لازم يعرف ان سيادته هو وكل الخلق أخوات
ويقف زيك فى الطوابير لأجل يحس الآم الغير
وميلهفش متين مليون وأنت تعيش بثلث ميات
......
فتح عينك لاحسن هازعل خليك مصرى جميل ومصحصح
بعد ما قمت بثوره عظيمة لازم تعلى ولازم تنجح
وارفع شأن وطنا لفوق وانصح الحاكم بالزوق
ماذا وإلا على التحرير يا تجره على باب المدبح
.....