من الشعب المصرى إلى بورتوريكو.. "يا ديسباسيتو ما تمت خدها الإعصار وراح".. 10 نصائح عشان الحسد ما يأثرش فيكو.. الخرزة الزرقاء والملابس المقلوبة سلاحكم.. والبخور والملح حل سحرى

تكتبها - إسراء عبدالقادر- رسوم - أحمد خلف
ضجة كبيرة أحدثتها الأغنية الشهيرة «ديسباسيتو» بلحنها الذى أصبح يسرى على الألسنة دون انتباه، فمنذ أن تم طرحها على مواقع التواصل الاجتماعى، وتفاعل معها الملايين وحصدت ملايين المشاهدات فى أيام قليلة، وجعلت أنظار العالم كله يلتفت نحو بورتوريكو، ذلك البلد الصغير، وأصبح وجهة للعالم لزيارة معالمه التى ظهرت فى الأغنية، لكن لأن «عين الحسود فيها عود» جاء إعصار «ماريا» ليجرف معه أحلام كل سكان الجزيرة فى النهوض لخطوات إلى الأمام، وتغيير الواقع الذى يعيشونه، وفجأة تحولت الجزيزة إلى «خرابة» كبيرة، ومن هنا نقدم لك أخى البورتوريكى نصائح للتعامل مع الحسد..



أخى البورتوريكى الحل سهل وبسيط، هتعيد تصوير «ديسباسيتو» بس بالتاتش المصرى الأصيل، جلابيتك البيضا المقلوبة، خرزتك الزرقا، واللى يقولك بتعمل إيه وريله الكف الأزرق.


«بخرى وخمسى يا بورتوريكو».. البخور حل سحرى عزيزى البورتوريكى للوقاية من الحسد، طيارات البلد كلها هتلف فوق الجزيرة 7 مرات رايح جاى تبخر من شر حاسد إذا حسد.


من النهارده مافيش مواصلات من غير كلام، عزيزى المواطن البورتوريكى هننقلك فخر ثقافة المواصلات المصرية، أى عربية ، أتوبيس، توك توك، أو قطر فى الجزيرة لازم يكتب على ضهره العبارات دى، واللى يخالف قانون المواصلات الجديد نسيبه للحسد يقضى عليه.


خلى الغلابة تاكل.. فرصة وجت لحد عندك أخى البورتوريكى الكادح، وعشان نخرج من أزمة الحسد والدمار دى هندبح ونشفى ونوزع عالغلابة، وهندور فى وسط أطفال بورتوريكو على بكار أبوكف خفيف وصغير عشان يملا حيطان شوارعها كفوف حمرا.


نيجى لكل بيت على الجزيرة من النهارده يا أخى العزيز مافيش شبشب قديم هيترمى، على باب كل بيت فى الجزيرة وهتعلقه مع خرزة زرقا كبيرة ومن غير ما تسألنى ليه، أنا نفسى معرفش بس دى خبرة 7000 سنة مدوخين الجن والعفاريت.


الأخت العزيزة بطلة الأغنية «كفايا فشخرة»، دارى على شمعتك تزيد شوية، من النهارده عبايتك المقطعة، التكشيرة الحلوة، البؤس الجميل، وانكرى أى نجاح أو شهرة جاتلك بسبب الأغنية.


الأخ الغالى لويس فونسى، أكونت الفيس بوك مهم جدًا فى الوقت ده، أوعى تشير أى فيديوهات للأغنية، ابدأ حملة «لقح واستريح» بوستاتك الحلوة، واللى لازم آخرها يبقى فى #مقصودة أو #موجهة.


العروسة الورق ممكن متكونش سمعت عنها قبل كده، بس «سرها باتع» واسأل مجرب، هتقص الورقة على شكل عروسة، وتنتطلق بالدبوس من عين فلان وعلان وكل من سمع ديسباسيتو ولا صلاش على النبى.


أعزائى أبطال الأغنية، نصيحة من أخ، من النهارده مفيش خروج من غير ملح، كل مواطن بورتوريكى هيرش الملح على الجزيرة 3 مرات فى اليوم صبح وليل، ومرة بعد سماع الأغنية.


أخى الحبيب أقرب عطار فى بورتوريكو واشترى تموينك من الشبة والفاسوخة، ماتستغربش دى وصفة مصرية بنت لذينة، هترش الشبة والفاسوخة قدام باب بيتك وفى الشارع، ولو قدرت توصل لحد حدود الجزيرة.