بالفيديو.. عمرو يوسف يطمئن جمهوره بعد شائعة ضبطه وزوجته وبحوزتهما مخدرات: "صحيت على خبر غريب وبايخ.. أنا كويس وكندة زى الفل".. ويتوعد ناشرى الشائعة: "هرفع قضية وهناخد حقنا بالقانون"

نفى الفنان عمرو يوسف شائعة القبض عليه وزوجته الفنانة كندة علوش، بمنطقة العجوزة وبحوزتهم مواد مخدرة، مؤكدًا على أنها شائعة سخيفة وليس لها أساس من الصحة.

وقال عمرو يوسف، فى فيديو بثه عبر حسابه الرسمى على موقع التواصل الاجتماعى "فيس بوك"، قائلا:"صحيت النهاردة الصبح على خبر بايخ جدا وغريب جدا، كاتبين أحد المواقع أنه تم القبض عليا أنا وزوجتى فى القاهرة، ومعانا أقراص مخدرة، طبعا الموقع ده المفروض أنه موقع محترم وكبير وله أسمه".

وتابع عمرو يوسف فى الفيديو :"مبدئيا كندة مراتى فى الجونة، واللى متابعنا على السوشيال ميديا بقالنا فترة قاعدين فى الجونة، وأنا رجعت امبارح وهى لسه هناك، عشان كان عندى اجتماع شغل، امبارح والنهاردة وهسافر تانى، الموضوع مالوش أى أساس من الصحة، صحيت النهاردة لقيت الخبر زى الناس بالظبط، لقيت واحد صاحبى بيصحينى الحق ده فى خبر كذا كذا".

وأضاف عمرو يوسف :"بعمل الفيديو ده عشان 3 حاجات أول حاجة عاوز أطمن كل الناس اللى بتسأل عليا والتليفونات الكثيرة اللى مش عارف ارد عليها كلها، بشكركم جدًا أنا زى الفل وما فيش أى حاجة وكندة فى الجونة واحنا زى الفل".

وتوعد عمرو يوسف ناشر الشائعة قائلا: "تانى حاجة كل موقع أو صحفى كتب من غير ما يتحرى الدقة أو يتأكد من الخبر أنه صح أو غلط، فى قضايا ها تترفع علشان نجيب حقنا بالقانون".

وأنهى عمرو يوسف حديثه قائلا :" رقم 3 بشكر كل صحفى محترم أهتم وكلمنى وأنا رديت عليه وأتاكد إنه مفيش أى حاجة وأنا فى البيت مفيش أى مشاكل خالص وبشكركم جدًا إنكم اهتميتوا وكتبتوا الأخبار الصحيحة مش الغلط، بشكركم جدًا وأنا كويس جدًا وكندة زى الفل وصباح الفل عليكم".


وبدورها قامت الفنانة كندة علوش بالرد على الشائعة عبر حسابها بموقع التدوينات القصيرة "تويتر" وكتبت :"صباح الخير أنا فى الجونة وعمرو فى القاهرة عنده شغل وراجع تانى، شكرًا لكل صحفى محترم اتصل وتحرى الدقة أما المواقع المغرضة فبيننا وبينها القضاء".

وحرص عدد من الفنانين والإعلاميين على مساندة كلا من الفنانة كندة علوش وعمرو يوسف بعد نشر الشائعة، حيث كتبت الفنانة رشا المهدى عبر حسابها بموقع التدوينات القصيرة "تويتر " :" لسه مكلمه عمرو يوسف، بيطمن كل جمهوره أن الكلام الفارغ المكتوب مش هيمر مرور الكرام ومصدر الإشاعة رهن التحقيق حاليا".

وتابعت رشا :" علاقتى الشخصية بكندة وعمرو خلتنى لما قريت الإشاعة كنت فاكراه مانشيت وجوا الخبر تفاصيل لعمل فني مثلا، عيب اللى بيحصل ده و سمعة الناس مش لعبة".
وكتب الإعلامى رامى رضوان عبر تويتر :" صدمت من شائعة عمرو وكندة، كلمت عمرو قالى أنا فى البيت وكندة مش فى القاهرة أصلا، المتداول كذب وعمرو أكد أن مصدر الشائعة رهن التحقيق الآن".