زيادة حسب المزاج ولا عزاء للركاب

خبر ممكن تسمعه يزعلك مثل زيادة الأسعار اليومية.. فى ظل الظروف الصعبة والأزمات الاقتصادية، الحكومة تقرر زيادة أسعار الوقود «يقوم هوبا بعض السواقين» يستغلون هذا الظرف فى شتى أنحاء المحافظات وبالمزاج، يعنى فيه اللى يزود نصف جنيه على الفرد، وفى اللى يزود جنيه وعلى رأى الفنانة نادية الجندى فى مقولتها الشهيرة « كله ماشى يا تاج راسى».
ويا سلام بقى لو جيت تسأله إزاى يا جدع على رأى الفنان «عادل أمام» إزاى تزود جنيه بحاله، يقولك البنزين بقى «ب5 جنيه والحسابة بتحسب»، طيب يا اسطى يعنى إنت هتاخد من ال14 راكب كل فرد جنيه زيادة، يعنى بمعدل 14 جنيه فرق فى الدور الواحد، إيه يا أستاذ الكلام ده إنت هتحسدنا ولا إيه، لأ بس اللى حضرتك بتقوله ده غلط وحرام، يعنى إنت هتجيب فرق البنزين فى دور واحد أو فى فردة واحدة، بلغة السواقين: «هى الدولة اللى عاملة كده يا بيه»، أرد عليه الدولة قالت 50 قرشا فقط زيادة، يقولى خلاص خلى الدولة توصلك شغلك، أرد عليه قائلاً، إزاى يا جدع، يقولى هو كده.
وينتهى الحوار بينى وبينه، يقوم "هوبا" مشغل الكاسيت ومولع سيجارته ولا أكنه على الكورنيش، وطبعا فى ناس بتتكلم فى التليفون وقالبينها سنترال ولا فى دماغهم أى شىء مع تعلية الكاسيت، الست يا اسطى وطى الكاسيت شوية، يرد قائلا ما بيوطاش يا أبلة، خلاص أطفيه، أطفى إيه يا ست إنتى لو مش عاجبك ممكن ما تركبيش معايا تانى، الست ترد أنا بركب بفلوسى يرد السائق وأنا مش مستنى فلوسك يا ستى، كلمة من هنا وكلمة من هنا الموضوع يطور إلى تدخل الركاب يا اسطى عيب دى واحدة ست، يقوم يرد يعنى واحدة ست تحبس حريتى، لأ يا اسطى اسمع براحتك بس وطى الصوت شوية. وينسى الركاب الجنيه الزيادة واستغلال السائقين .