إلى أخويا القبطى

بعزيك والحزن قايد نار * أنت أخويا حبيبى وجار
أنت زميلى صاحب عمرى * راسمين أحلامنا طول المشوار
مصيبه كبيره جرحت روحنا * وهزت جوا القلب جدار
طفَّت لينا شموع العيد * خلَّت حزن فى كل ديار
خلَّت كل دموعنا تسيل * خطفت بهجة وناس أبرار
إرهاب جايب فتنة وجاى * عايز يحطم بينا عمار
شاف الحب بيروى قلوبنا * هب الحقد فى قلبه شرار
عايز يفرِّق بينى وبينك * ويهز بلدنا واستقرار
عايز يدبح فينا الحب * وعايزالدم يسيل أنهار
عايز يزرع شوك فى طريقنا * يجرفنا بغدره فى التيار
عايز يحقق هدفه الأسود * نفسه بلدنا فى يوم تنهار
بس الوحده سلاحنا الأقوى * ضد عدو جبان غدار
مسيحى ومسلم مركب واحد * سد منيع ضد الأخطار
رمز الحب الأزلى الطاهر * شعب موحد أحلى شعار
لو جات شوكه لوحد فينا * الألم يصيبنا كبار وصغار
لو جات فتنه ودخلت بينا * نشرب كل كاساتنا مرار
أيوا الجرح كبير وصايبنا * والقلب بيدمى ليل ونهار
بكل صمودنا وحب وطنا * كل عدو رايح يحتار
مهما يحاول أكيد هيخيب * ويجنى بإيده الخيبه وعار
إيدى فى إيدك نداوى جروحنا * ونحمى بلدنا من الأشرار
مصر وطنا الحضن الآمن * مصر راعيها عظيم ستار