بعد قراراها اعتزال الغناء.. هاشتاج "ساندى" فى قائمة الأكثر تداولا على "تويتر".. ومغردون: ربنا يوفقك و مش مهم الفن و لا غيره المهم ترضى ربك.. وساخرون: "الهوت شورت مش هيتلبس من بعدك يا غالية"

دخل هاشتاج "ساندى" فى قائمة الأكثر تداولا على موقع تويتر، بعد قرار ها اعتزال الغناء وطلب المغفرة عن أى ذنب ارتكبته فى هذه المهنة، التى تسببت فى مرضها، على حد قولها.
وقالت ساندى عبر صفحتها الرسمية على "فيس بوك"،: "قررت أنا ساندى عادل أحمد حسين الاعتزال من هذه المهنة التى أدت إلى مرضى بسبب الضغوط النفسية التى أتعرض لها.. و لن أتراجع عن هذا القرار.. وأطلب من الله المغفرة عن أى ذنب ارتكبته بسبب هذه المهنة".
وتباينت ردود أفعال رواد تويتر ما بين مؤيد ومعارض لقرارها، والداعين لها والساخرين منها، حيث قال حسن: "مع إنى زعلان بس ربنا يهديكى ويوفقك فى حياتك"، أما حودة فقال: "ده اللى هو إزاى.. ربنا يهديكى.. يلا يا جماعة كل واحد عنده أغنية ليها يمسحها.. أول واحد همسح الألبوم بتاعها الأخير"، بينما قالت ميرى: "أنا مش عارفة زعلت ودمعت ليه.. مع إنى كنت بحبها عادى.. شكلى كنت بحبها جدا وأنا مش عارفة.. بس كل اللى هقدر أقوله ربنا يوفقها ويسعدها".
ودون البرنس قائلا: "ساندى بتقول أنا اعتزلت وبطلب من الله المغفرة.. وفى ناس بتتريق عليها.. الله وحده يعلم ما فى القلوب.. ربنا يهدينا جميعا"، وقال آخر: "ربنا يوفقك يا ساندى و مش مهم الفن و لا غيره المهم تكونى مرتاحة و ترضى ربك"، فيما دعت لها نور قائلة: "برافو وربنا يثبتك يا حبيبتى وألف مبروك"، وهو ما أكدته مى صالح التى قالت: "برافو عليها والله.. ربنا يتقبل منها".
أما محمد أنس فكان له رأى آخر، وكتب:" لما بشوف تعليق الشباب على إن ساندى اعتزلت بتأكد إن البلد دى المشكلة فيها الثقافة قبل أى حاجة تانى.. غير من نفسك.. العيب فى الفكر"، بينما قال مروان:"ساندى اعتزلت.. يا فرحة المواكيس اللى بيقولوا على نفسهم بنات"، وقالت ميادة: "ساندى اعتزلت يا جماعة.. الشباب هتزعل أوى"، فيما سخر حساب آخر: "ساندى تابت وإحنا لسه يا بنى آدمين.. أكيد عندها امتحانات وخايفة تشيل".
كما أبدى آخرون حزنهم على اعتزالها، حيث قال بحسن: "ساندى عتزلت..ليه المفاجأة اللى كانت مش على البال دى.. ده الهوت شورت مش هيتلبس من بعدك يا غالية.. ساندى لا للاعتزال"، فيما قال على حسن:"ساندى اعتزلت يا جدعان.. وحفلة رأس السنة اللى فى الشرقية دى هاتعملى فيها إيه.. ده الشراقوة يجبوكى بالهوت شورت بتاعك فى شوال".
وعلى الجانب الأخر رأى آخرون أنها غير حقيقة، حيث قالت لينا:" كذبة عيد الميلاد دى"، وهو ما أكده محمود جاويش الذى قال: "لا لا أكيد الصفحة اتسرقت وواحد منزل البتاع ده.. ساندى متعملش كده"، وقالت آية: "لا بجد أكيد بتهزر.. ساندى لا متسيبناش.. غزاى الكلام ده أكيد بتهزر فى حاجة غلط.. ده الألبوم الجديد هينزل فى شهر 2 "، بينما دونت أميرة:"حاسة إن حوار ساندى هيطلع فاكس.. وهتطلع تقول أنا كنت بقولكوا هابى نيو يير على طريقتى".