فى ذكرى رحيله.. 5 قصائد للحب والحياة ل"الفاجومى"

1
يا حبيبى كان زمان
يا حبيبى كان زمان
طلعة الورد بأوان
بعد ما بان. .
ورد خدك. . و الله
و الربيع طول الزمان
يا نعيمى لما هلت
شمس نورك عاليالى
نورت لى
صورت لى
جنة أجمل من خيالى
يا حبيبى
يا غزالى و إنت خالى
شوف جرالى ما جرالى
رحت أغنى
غصب عنى
و اشتكيت للورد حالى
يا حبيبى
2
أنا أتوب عن حبك
ا أتوب عن حبك؟
أنا اتوب عن حبك أنا ؟
أنا لى ف بعدك هنا ؟
دنا بترجاك
الله يجازيك
يا شاغلنى معاك
وشاغلنى عليك
وان غبت سنه
أنا برضه أنا
لا اقدر أنساك
ولا لى غنا
ولا اتوب
عن حبك أنا
زى ما يحلالك
زى هواك
سهرنى عليك
سهرنى معاك
دنا عمرى ما اخاف من هجرك يوم
ولا قلبى بيفرح ونا وياك
وان كان أمل العشاق القرب
وأنا أملى ف حبك
هو الحب
وان غبت سنه
أنا برضه أنا
لا اقدر أنساك
ولا لى غنا
ولا اتوب عن حبك انا
أنا لا اتمنيت
ولا قلت يا ريت
ولا بعدك عني
جعلنى سليت
دنا كل منايا أدوق اللوم
ويقولوا على الناس
حبيت
وان كان أمل العشاق القرب
وأنا أملى ف حبك
هو الحب
وان غبت سنه
أنا برضه أنا
لا أقدر أنساك
ولا لى غنا
ولا اتوب عن حبك أنا
تخاصمنى كتير
نصالحنى كتير
كل دا يا حبيبى ما لوش تأثير
توصلنى سنين
تهجرنى سنين
ما تغيرنيش
دنا حبى كبير
وان كان أمل العشاق القرب
أنا أملى فى حبك
هو الحب
وان غبت سنه
أنا برضه أنا
لا اقدر انساك
ولا لى غنا
ولا اتوب
عن حبك أنا
3
باستنظرك
باستنظرك
باستنظرك
رغم القساوه فى منظرك
لحظة هروبك يارباب
م الحب لما استنصرك
باستنظرك
باستنظرك
باستنظرك
رغم الشتا والبرد والرعد المخيف
باستنظرك
فى الشارع المشغول بأوحال الرصيف
أنا أصلى حاسب موعدك
وعارف اللى بيبعدك
وانا اللى خابر تبقى مين
وانا اللى صابر من سنين
وباعد لك
بالثانيه عمري
واعد لك مطرح ف بستان الأمل
وبامد لك
وف كل خطوه أمد لك
إيدى اللى شققها العمل
*
مدى الخطاوى ياحبيبتى وقدمي
وان كنتى خايفه م الطريق اتبسمي
ياشمس ياللى ضحتك
قمر ينور سكتك
أنا اللى عشقك يستتك
باستنظرك
باستنظرك
ياجرحى ياحلمى العنيد
باستنظرك
باستنظرك
يامصر ياحبى الوحيد
وحتيجى يوم وتصدقي
عشقى الأصيل وتحققي
حلمى الجميل وتزوقي
عمرى اللى ضاع مستنظرك
باستنظرك
باستنظرك
باستنظرك
4
غنوة للسلام
قد إيه القلب يعشق
لو سمع غنوة سلام
ياسلام
قد إيه والغنوه تحلى
لو بدينا بالسلام
ياسلام
قد إيه الروح تميل
والنغم يطلع جميل
والوتر يوصل كلامه
للقلوب
صافى وأصيل
قد إيه
وقد إيه
بس اقول إيه ولا إيه
السلام دا كلمه خضرا
زى أغصان الريحان
ترتوى منها الشفايف
لما تجرى ع اللسان
زوقوكى الناس يادنيا
بالكلام عن السلام
والكلام غير الحقيقة
والعمل غير الكلام
ياسلام
من هنا نبدى الكلام
ياصبابه يامغرمين
كلنا نحب السلام
والسلام بيحب مين ؟
السلام بيحب نورا
وشوفوا نورا تبقى مين
نورا بنت عيونها خضرا
زى قلب العاشقين
والخدود ورديه خمري
والشفايف توت وتين
والضفاير
تبر طاير
يبعت النور والرنين
والنهود حراس مدينه
بالبنادق سهرانين
يحرسوا قلب المدينه
من عيون البصاصين
والمدينه فى عصر نورا
صوروها المنشدين
هى جنه إنسانيه
للبنيه
وللبنين
فيها غيط القمح كافي
يدى كل المحتاجين
فيها نهر الحب وافي
يسقى كل العطشانين
فيها نور البدر صافى
يهدى كل الحيرانين
فيها مطرح للسلام
لو فرش يقدر ينام
فيها كل الناس
حبايب
فيها كل الناس تمام
ياسلام
قد إيه القلب يفرح
لو يزور بيتنا السلام
ييجى ومعاه الحبايب
نورا والنور والكلام
لافش الأرض الحبيبة
حنه
واعمل مشايات
وانصب الشادر يلالى
بالكهارب والزينات
واسقى كل الناس حبايبي
ميه وردى ف الكاسات
وادعى كل عيال حارتنا
بالمزاهر والنايات
ينشدوا الألحان
فرايحي
تسرى ف قلوب البنات
تعمل الأنغام عمايل
ترسم الأحلام
حاجات
لو قالوها لامهاتهم
أو عادوها للخالات
يفهموها
ويداروها
عن عيون الأبهات
ويقوموا لها ويقعدوا لها
ويغزلوا لها الأمنيات
والربيع يوصل مادام
ف الوجود نسمة سلام
والزهور تطرح جناين
والعبير يرسم حمام
زوقوكى الناس يادنيا
بالكلام عن السلام
والكلام غير الحقيقة
والعمل غير الكلام
ياسلام
5
فى الليل
الليل ملاح
تايه سواح
لا يبوصل شط
الليل مشحون أسرار وشجون
وألم ونغم
وكاسات ونايات ودموع وآهات
وعبر وحكم
***
ومشيت فى الليل
خجلان مكسوف
إكمن الليل عريان مكشوف
أفراح الناس
وجراح الناس
على صدر الليل عناقيد وصفوف
وعيون الليل والضلمة جبال
فاردين على وش السما غربال
ألماظ مبدور
فى كاسات بنور
يفرش للنور ع الأرض خيال
***
ويشق سكون الكون
أرغول
ونغم فنان ثاير مخبول
وعليل على فرشه بيتقلب
ويحايل جرحه المداري
ويقول
يا طبيب قلبك طيب
إسمعني
ح أقولك أسراري
لوشلت الشكوى على لساني
ورميتها قريب
ما تكونش جراحى مألماني
أبدا يا طبيب
أنا دقت الجرح وخدت عليه
يسقينى المر
وبرضه اسقيه
من بحر الصبر اللى ف قلبي
ح تقوللى بتشكى امال من إيه؟
ولا من أوجاع
ولا شوق ملتاع
دنا عمرى إن ضاع
مش ابكى عليه
أبدا يا طبيب
يا طبيب دنا جرحى ملوعني
وساقينى الحنضل من كاسي
والنار فى ضلوعى بتلسعني
وأنا لسه صغار
والعيا قاسي
ولا عمر الليل مرة سمعني
عليت الآه على أنفاسي
أبدا يا طبيب
لكن يا طبيب أنا بابكى صحيح
وباقول الآه
زى المجاريح
ودموعى فى عينى بتتألم
وبتتكلم
على قلب جريح
مسكين
كان أمله يحب سنين
ويلم الحب ف عشه اتنين
واتهنى معاه
وإن قال الآه
أنا اقول له يا روح القلب
آهين
بس أنا لا بيدي
ولا بودي
دا قدر مقسوم
قدر لحبيبى يعيش بعدي
فى الهوى محروم
أهودا اللى وجعني
وخلاني
حطيت الشكوى على لساني
إنما وحياة اللى قاسيته
وحياة الأمل اللى بنيته
وحياة اللى جرحته
ولا فرحت معاه
ولا هنيته
لوشلت الشكوى على لساني
ورميتها قريب
ما تكونش جراحى مألماني
أبدا يا طبيب؟
***
وينام الصوت
والكون حواليه
ساكن نعسان
وكأنه مات
رمى تقله عليه
سكت العيان
***
الكاس له ناس
والليل مجالات
والحان مليان والناس مزاجات
ومجال الكاس
أشكال أجناس
مليان حواديت
مليان رويات
***
ونزور فى الليل دنيا الخمار
ونلاقى الكاس
ع الناس دوّار
ويموت الليل على باب الحان
حيخش ازاى والدنيا نهار
ونفوس وقلوب كده ع المكشوف
عريانه تمام
وتعالى نشوف
***
شوف دا اللى هناك
قدامه كاسين
مع إنه لوحده
ما هوش اتنين
والناس بيبصوا
ومش فاهمين الكاس دا لمين
والكاس دا لمين
أهودا اللى بنظرة عين
شبكوه
وفاتوله كاس مليان
وفاتوه
وحكايته طويلة
وهمه تقيل
وح اقول لك إيه وأعيد لك إيه
رايح يملا عيونه بحلم جميل
بياع السهد ملا له عينه
***
وترن ف جوالحان
ألحان
نشوانه تخلى المولد هس
وغزاله بتتغزل ف حصان
بتقول له
إحبك أنت وبس
ويفز هنا سيدنا المنظور
ويطب الكاس ف إديه
مكسور
ويقول غشاشه
حتلعب بيك
ويرد التانى عليه بفتور:
طب وانت مزعل نفسك ليه
حشرى وسخيف
وح قولك إيه
ومانولى يقول
" موش أندك خق"
والسامر يضحك لما يطق
ويحط الحشرى عنيه
فى الأرض
وكأنه لحن فى الدين
والفرض
ويقوم
يطوح مرة يمين
ويميل زى البخت شمال
وف جوف الليل
يغرق مسكين
لا يغير حال
ولا يشغل بال
***
الحظ حمار
من غير حمار فقد التمييز
زى المجانين
هجر البساتين سكن الدهاليز
والحظ بطبع غباوته عنيد
ودماغه حديد
لو يعند حتى على الغزلان
ينسخطوا معيز
ونسيب دهليز
نخش فى باب
ونعدى الباب ندخل سرداب
ونلاقى ضحايا الليل واقفين
والحظ بيلعب بالأعصاب
ترابيزة عليها نمر بنظام
من واحد يمكن لما لألف
والدنيا بزى ما هى تمام
على هيئة كورة
تدور وتلف
وشنب مفتول
يصرخ ويقول
اللقمة بتنده أكالها
والرزق نصيب
والدنيا دايرة
ف احولها
زى المجاذيب
الصبح معاك
والضهر عليك
والحظ لو ادى
ما بينقيش
جربها
ويمكن لو تديك
من جودك برضه
ما تحرمنش
قرب قرب
جرب جرب
ودى لعبة حظ
ما فيش تبكيش
***
والكورة تدور
زى المقدور
تحرن على ناس
وتجامل ناس
والشيخ سلمون شعبان مندور
واقف على أعصابه ومتحاس
يعلب ع الستة
الخمسة تصيب
ينقل ع الخمسة
الخمسة
تخيب
وخلاص الحظ اداله قفاه
والحظ أن ولى
بيبقى عجيب
كلها ساعتين
وصريخ
سلمون لعلع مقامات
نهاوند ورست وسيكا وصبا
وحجاز وبيات
يا فلوس الناس
يا خراب البيت
يا نهار مشوم
طب المسكين من طوله ورفص
يظهر مات
والناس ملهيه ف أحوالها
بيدوسوا عليه
وبتاع الكورة مشغلها
ح يبطل ليه
واللقمة بتنده أكلها
طب ودا كل إيه؟
***
الشارع نايم تحت جناح الليل همدان
وعيون النور
تعبانه بتنعس ع العمدان
والكون ملفوف
بعباية
نسجها الليل بالخوف
وف بحر الضلمة رأيت على بعد
شبح
حققت بعيني
لقتها يمامة وكاسرة الطوق
كرابيج الليل
ناقشينها جراح
من تحت لفوق
والأسى ف عينها
مصحى الشكوى تقول حواديت
حواديت
ما لهاش علاقات بالشوق
وليالى الشوق
مسيت
ورميت على الحلو سلام
قالت سلامين
أنا قلت لوحدك ليه يا حمام
ووليفك فين
مالك بالليل وجبال الرعب
خليك يا حمام
عيش للحب
شالت بجناح
حطت بجناح
ورتنى جراح
تحت الجناحين
وقالت لي
زمان الحب ما راح
وبقى لنا سنين فى الليل ضايعين
خد منى الليل
وادانى الليل
ورميت له الغالى بسعر زهيد
وسقانى الشهد ودقت الويل
وكسانى حرير ولبست حديد
وعرفت الناس من الراس للديل
وآمنت بأن الكل عبيد
وقالتها وطارت فى ثواني
وانا شارد وخيالى يصور
وغمزنى الفجر وصحاني
ولقيت الكون بادى ينور
وصحيت من غفوة سرحاني
على صوت بيقول
موضوعات متعلقة..
اليوم.. الذكرى الثانية لرحيل الفاجومى أحمد فؤاد نجم