عصام شلتوت يكتب : فى الأيام الكروية التشادية السودا.. اعرف عدوك.. نفوز ازاى يعنى.. واللاعب المحترف طالب ومنجد سيدتك.. مدربو ال"نص يوم" تفرغ من العمل لمهمة قومية ب1/4 مليون

عجيب أمر الكرة فى بلدنا.. مش لأنها كل يوم فى حال.. ده طبيعى جدا فى بر مصر.. اللى اللاعب فيها طالب جامعة.. وبيوقع عقد احتراف، مجند، وبقوة لا إله إلا الله، برضه يوقع عقد احتراف؟!
أما المدربون فحدث ولا حرج.. مدرب وبيزنس، وموظف فى نفس الوقت.. وكأنه يعمل فى تدريب الخيال العلمى!
مدرب.. واخد «تفرغ» من عمله «الأساسى».. واخد بال حضرتك من «الأساسى» دى، يعنى الوظيفة، ووقع عقد احتراف للتدريب نص يوم!
اوعى تفهمنا غلط.. ده بيكتبوا فى طلب التفرغ، اللى بيوقعه مسؤول كبير قوى.. أنه فى «مهمة وطنية».. بربع مليون بس فى الشهر .. يا أخى إيه ده!
بعد كل ده عايزين تشوفوا مستوى كروى ثابت.. لا وإيه.. فاخر.. ونكسب فى أى وقت أى فريق!
يا سادة مباراة الكرة المصرية وحدها دونا عن كرة خلق الله. لا تعرف المستوى فى ال90 دقيقة ها يمشى آزاى.. ولا يمكن توقع آى شىء.. طب والله.. المراهنات لو مسموح بيها فى مصر.. كانت ها تبقى مسخرة!
الكورة المصرية «معيوبة» جدًا.. لا يمكن أبدًا أن تدخل عمرة لإعادتها كما السيارات المستعملة، لأنها ببساطة تشبه صناعات تحت بير السل.. بدون ماركة، ولا وصفة ولا ضمان طبعا.. والوكيل.. على ما تفرج!
لكن نقول لمين.. ومين ها يسمع ندانا.. ده نظام مفروض علينا.. أندية تدفع 3 آلاف جنيه مشاركة كاس، ويتصور كام لاعب منهم بشورتات شرعية عند الترعة فتصبح كرة شاطئية.. وبكدا يبقى ليه صوت!
حضرتك اتحاد بلدك عضوياته تتعدى ال200 وحاجة نادى.. يا نور النبى!
طيب لو عايز تنشر القاعدة.. ليه يا أفندى يا محترم ما متخليش كل الأندية دى أعضاء ب«الانتساب».. يتلقوا، كل الخدمات ويتم تأهيليهم.. لكن يبقى التصويت لاختيار من يدير الكرة قاصر على أندية الدورى «المحترف».. يا رب نعيش ونشوفه.. ودورى الدرجة الأولى المحترف برضه واللى لازم يكون عدد أنديته مماثل لعدد أندية دورى المحترفين والعياذ بالله.. يعنى 18 ناديا يبقى الدرجة الأولى 18.. برضه.. دواااااليك.. إلخ وكله!
لكن شيئا ما يحدث.. فلا أحد يحاسب.. واسألوا الأندية عن لاعبيها المحترفين نصف الوقت، وهم طلبه ومجندون.. لدرجة أن غرفة خلع الملابس تحتفل أحيانا بنجاح المحترف قابض الملايين فى سنة تانية جامعة.. أو تبقى الفرحة الكبيرة مع الليسانس حضرتك!
يا سادة حتى تشاد الطيبة دى.. فيها محترفين خالص فى الأندية، والمبارايات ليها دخل وتذاكر وبث وحاجات!
طبعا.. عيب لما أكلم حضراتكم عن غانا ونيجيريا والجزائر.. يااااااه ده احنا بعيد خالص عنهم!
سيبك بقى من تركيبة التصويت.. وتوقيع لاعبين ومدربين كمحترفين أيام السبت والأربع والاثنين.. قلناها خلاص.. وتعالى نشوف الباقى!
يا سادة إذا طلبنا الإصلاح.. فيجب إلا ننسى أيضا أن للإعلام بكل فروعه دورا يجب أن يلعبه.. لأننا بالفعل نصل إلى حالة من العداء.. أو الحب الأعمى للأماكن والمسؤولين والقرارات.. وكأنهم الوطن!
يمكنك الحكم بنفسك.. فهناك المحبون الذين يهيمون عشقا فى دبابيب المسؤول.. فتجد من يخرج ليقول: عرفته مواطنا جميلا.. يبكى والله من أجل مصر.. ويترك بيته وأسرته لوجه الوطن.. أنه يا سادة المهندس هانى أبوريدة، أو الوزير خالد عبدالعزيز.. أو جمال علام رئيس اتحاد الكرة.. وهكذا!
لاحظ.. أنه يحدث أحيانا.. أن يشذ المحب عن القاعدة، لكن لأنه كان قد قدم السبت «الحبى» .. فيعود ليقول بعد الخسارة مثلا: يعنى هو ينفع كدة؟.. عاجبكم.. منكم لله مش عايزيين نتكلم.. ونقول هى الناس دى إيه؟!
خد عندك اللى يطلع كوبر عالمى مرة.. بل ووطنى وبيحب مصر أكتر من اللى خلفونا.. ومرة نص تانية.. يطلع الراجل وصل مصر عشان ينهب خيرها وياخد فلوسنا.. الله لا يبارك له بيها!
طبعا لا ننسى مع حالة الحب كلمات زى.. غياب التوفيق.. عملنا كل حاجة فى الكورة.. عصبية فلان.. أرضية المعلب.. عدم استغلال الفرص السهلة.. اللى جاى أكيد أحسن!
يا سادة بالفعل إذا لم نسعَ الآن.. جميعا لمحاولة إصلاح رياضة بحجم كرة القدم يمكنها خلق فرص عمل وتنشيط الاستثمار، والعملة الصعبة بأرقام كبيرة.. فعلى الأقل، نكون عرفنا عدونا.. ونسعى جاهدين لإيقاف مسألة تغوله وامتلاكه مساحات جديد من أرض الوطن الكروى.. إلى أن يهبنا الله مصلحين فى كل سكك وطرق ومناحى الرياضية المصرية.. يا رب نكسب تشاد.. لا يقولوا السوداويون.. دمويون.. ومصر لا يحبون!