من فضيحة المدرب الحصرى للمنتخب للعب مع «غينيا 2»

قلنا مش محترفين زعلوا جدًا، واتهمونا بالجحود، وإنكار الصداقة والعلاقة!
قلنا تعالوا نراجع مين بيدير ملف الاحتراف، يعنى إزاى نعرف وإزاى نكسب من الكورة اللى كل الدنيا بتكسب منها.. ده حتى الأرض كروية!
برضه قالوا اطلعوا من البلد!
قلنا راجعوا الأسماء والمهن، وحجم الطموح، فمن غير الممكن أن يكون هناك من يدير أندية مغمورة دون أى طموح، وكل ما لديه هو الشفافية، أو طهارة اليد، ودمث الأخلاق، وحسن السير والسلوك، بلاش السير فى الممنوع.. لأن ده مش كفاية!
قالوا بقى.. ليه؟!
قلنا لحضرات سيادتهم هذه المواصفات يمكن الاهتمام بوجودها فى عريس الست أختك، أو المحروسة بنتك، أو بنت أختك باعتبار الخال والد.
سيدى القارئ.. كل هذه المقدمة ليها لازمة، قبل حضرتك ما تقول إيه السبب، ورغم أن العنوان ربما موضح بعض الشىء، إنما نقول لسيادتك السبب.. اللى هو جديد لانج.. بلاها باقى الأسباب!
اتحاد الكرة والأفاضل فى الست جبلاية تعاقدوا مع كوبر مديرًا فنيًا لمنتخب مصر، وعلشان حضراتهم عايزين يوفروا لحبيبتهم مصر، علشان يطلعوا يقولوا كل شوية أحبيبتى يا مصر!
قوم بقى إيه، خللوا «راعى» يجيب المدير الفنى ويدفع الكام ملطوش بالدولار!
لأ، مش كده وبس.. ده كمان كتب العقد، وقال مين يشتغل.. ومين لأ!
أم المصائب والعياذ بالله، جنبًا إلى جنب مع أم العواجز الست جبلاية لم يفطنوا - يعرفوا يعنى- إن العقد بيقول إن المدرس حصرى مش للمنتخب المصرى.. لأ.. ده للراعى العصرى!
سيدى القارئ.. بنقول ميعرفوش.. طبعًا لأنهم لو عارفين ومنهم اللى مطنشين دى تبقى مصيبة!
بلاها مصايب وتعالوا نقول «الأنكت» من «النكت».. يعنى الله يرحمك يا عم حمادة.. آه سلطان صاحب قاموس النكت المصرية!
الأنكت سيدى القارئ أن الإعلام المصرى، وعلى رأسه الصحافة، لا يجرؤ كائن من كان من الصحف المنتشرة فى بر مصر أن يطلب، مجرد الطلب، إجراء حوار مع كوبر المدرب!
أى والله.. لأن «الراعى» والجبلاية «إيد واحدة».. والله شر العقود ما يضحك!
لعلها المرة الأولى التى أعرف فيها هكذا اتفاق.. عندما طلبنا أن نجرى حوارًا مع الخواجة كوبر كان الرد: بس شويه كده علشان الراعى، لأن الحقوق المصرية المكفولة إذا كانت أهدرت فإن من أهدرها هو اتحاد كرة بلدنا.. واضح بلدنا.. فى مواجهة صحافة وإعلام بلدنا برضه.. بالذمة ده كلام؟!
طبعًا وعلى الفور كان الرد إن ده مش هايحصل، وإن فى أول فرصة نلتقى كوبر سنجرى حوارًا.. فإذا طلب أذنًا.. فورًا سنطلب محاكمته ومحاكمة اللى جابوه.. بالطبع مش أهله.. إنما اللى اتعاقدوا معاه!
هل يمكن فى العام 2015 ونص أن يوقع مسؤولو الجبلاية اتفاقًا كهذا؟!
بالطبع سيخرج علينا من يقول إن العقد ليس فيه بند كهذا.. سنرد فورًا.. حتى لو كان مجرد يمين طلاق فهو مرفوض يا حضرات، هذه مهزلة بكل المقاييس!
ولأننا فى زمن العك الكروى، والجبلاية لا تريد تصويبًا.. وأرجو ألا ينزعج أحد، ولأن الإدارة الهاوية لا تؤدى إلا إلى «الهاوية»، فإن حكاية مباراة غينيا الاستوائية هى الأخرى تشكل.. تشكل.. آسف والله مش لاقى غير كلمة فضيحة.. كروية طبعًا.. وقبل ما حضراتكم تسألوا ليه.. الحكاية ببساطة خالص ما هو ده زمن إيه؟! الهواية!
لعبنا مع منتخب «غينيا 2»، وطالبنا حد يرد، فلم يرد أحد!
بالمناسبة المنتخب الاستوائى الغينى لعب يوم 29 مارس، يعنى بعد مباراة مصر وغينيا أمام كوت ديفوار مباراة قوية، كان بالتشكيل 7 لاعبين من غينيا شاركوا فى مونديال أفريقيا ببلادهم، بينما كان المنتخب المعدل اللى لعب معانا فى مصر تحت الطلب.. لأ وإيه برضه قالوا الشركة الراعية دفعت.. إنتم إيه.. مافيش حد صاحب فضل على البلد دى؟!.
يا سادة أنتم مطالبون بأحد شيئين.. الأول مزيد من الشفافية يرحمكم الله، والثانى إدارة محترفة تنقذ ما تبقى لكم من سمعة.. وأغلبكم الهواية قتلاه.. لأن المثل الشعبى المهم بيقول: بيت الهاوى.. زى بيت المهمل.. يخرب قبل جبلاية الظالم!
سيدى القارئ فى هذه الحالة يجب أن نعرف جيدًا بنود العقود الخفية بند.. بند.. علشان نعرف مين فيهم صح ومين مخطئ.. نفر.. نفر!
خلاصة الكلام الآن، سيحدث الآتى: إما أن يخرج علينا من يقول لأ مافيش مدرب حصرى للمنتخب المصرى، وده فى حد ذاته رائع ومفيد للسادة فى الجبلاية، أو من يخرج من يقول: ده البيزنس والصناعة، وده نقول لحضرته: من أنتم؟!.. يا ريت تراجعوا معانا هيكل الصناعة الكروية.. من الكتاب المصرى حتى!
أما حكاية «غينيا 2» فإننا ننتظر الرد اللى كان ممكن يكون ده الموجود، لأننا خايفين الراجل يتغلب!
ننتظر الرد.. أفيدونا.. وطمنونا عنكم.. إنشاء الله تكون الست جبلاية بخير.. وعلى فكرة.. لن يطول الصمت.. واضح!.