وزير النقل يتوعد قيادات السكة الحديد: "مش بنهزر واللى مش هيخدم المواطن يروّح".. الجيوشى: مش هفضل اتحايل على المسئولين عشان يشتغلوا.. مينفعشى كل ما أطلع قطار ألاقى فيه مشاكل.. وبمهلهم شهر لتغيير الوضع

توعد الدكتور سعد الجيوشى وزير النقل المسئولين بهيئة السكة الحديد بالمحاسبة، والاستبعاد من مناصبهم فى حالة عدم تحسين الخدمة المقدمة للجمهور، مانحا المسئولين مهلة شهر لتحسين الخدمة على مستوى جميع القطارات بأنواعها المختلفة، مستطردا "احنا مش بنهزر.. والله اللى مش هيخدم المواطن يروّح.. احنا جايين عشان نخدم المواطن واللى مش هيخدم الناس ميشتغلشى ويروّح".
وقال وزير النقل فى تصريحات خاصة ل"اليوم السابع" "لا تنازل عن تغيير الخدمة وتحسينها على مستوى جميع القطارات.. وأنا أعطتهم مهلة شهر.. الكل يشوف شغله.. وأنا مش هفضل اتحايل عليهم عشان يشتغلوا"، لافتا إلى أنه منحهم مهلة شهر لإصلاح الزجاج المتكسر بالقطارات وإنارتها وتوصيل المياه لدورات المياه على مستوى قطارات الجمهورية.
الحمامات والنظافة تمس كرامة المواطن
وأضاف وزير النقل: "فيه أساسيات تمس كرامة المواطن زى الحمام والنظافة.. ليه نهين الناس والقطار يطلع وسخ ومفيش فيه حمام ومفيش نور؟!.. دى كرامة مواطن ومفيش تساهل فيها.. هو انت بتشحن ناس فى القطارات يعنى؟!.. عيب مينفعشى"، مستطردا: "الفلوس موجودة واحنا بنتكلم فى حاجات بسيطة ومش بنطلب تحقيق معجزة من أحد.. وأنا مش بظلم حد.. أنا قمت ب6 جولات للسكة الحديد منذ توليت المسئولية قبل العيد..ومش هسيب حد ومستمر فى جولاتى الميدانية".
مستوى القطارات السيئ
وتابع وزير النقل: "مينفعشى كل ما أطلع قطار ألاقى مشاكل.. المواطن يستحق أكثر من كده.. وده حق الناس.. وأنا مش بطلب المستحيل.. والوضع ده لازم يتغير خلال شهر"، مستطردا: "المسئولين والموظفين مفيش حد فيهم بيزعل لأنهم فاهمين كلامى.. الخدمة إنشاء الله هتتحسن.. وأنا بتع سياسة العقاب والثواب.. اللى بيشتغل بيتكافأ زى ما كافأت مشرفين التحميل بميناء دمياط.. واللى مبيشتغلشى بحاسبه حساب عسير".
محطة دمياط ومهلة الوزير
كان وزير النقل منح قيادات السكة الحديد مهلة شهر مساء أمس السبت، خلال زيارته لمحطة سكة حديد دمياط مهلة شهر تنتهى أول نوفمبر المقبل لإصلاح كل دورات المياه بالقطارات والأبواب والشبابك، وكذلك إصلاح الإنارة والزجاج المتكسر بالقطارات، وذلك بعد يومين من إقالته رئيس شركة السكك الحديد للتأمين والنظافة المهندس مصطفى قناوى لعدم رضاءه عن مستوى النظافة القطارات والمحطات.
محاسبة المقصرين
وأعطى وزير النقل للمسئولين المهلة خلال زيارته لمحطة دمياط، مؤكدا أنه سوف يحاسب المقصرين إذا لم يتم التنفيذ خلال المدة المحددة، مستطردا "لو متنفذشى اللى بقول عليه هنقل كل المسئولين"، مطالبا قيادات السكة الحديد إعداد دراسة لنظام تأمين صحى يقدم خدمة طبية متميزة للعاملين، مع إضافة عربات مكيفة لخطوط بورسعيد ودمياط، تمهيدا لتشغيل كامل القطارات المكيفة بخطوط السكة الحديد.
وانتقد وزير النقل تفقده محطة سكة حديد دمياط تأخر إنهاء أعمال تطوير المحطة التى بدأ العمل فى تجديدها منذ عام 2003 ولم ينته حتى الآن، مانحا الشركة المنفذة مهلة ستة أشهر لإنهاء أعمالها، متعهدا لها بتذليل كل العقبات الإدارية والبيروقراطية التى تواجه الشركة، على أن يتم فتح المحطة للجمهور ابتداءً من أول نوفمبر المقبل.