البابا تاوضروس الثانى لأقباط المهجر: "فرحان بوجودى معاكم"

قال البابا تاوضروس الثانى، بابا الإسكندرية وبطريرك الكرازة المرقسية، فى عظة اليوم: "أنا فرحان أوى لوجودى مع أقباط المهجر بإيطاليا واحنا فى فترة عيد القيامة والخماسين المقدسة، المسيح عمل كل حاجة لأجلنا، مين اللى فرحان إحنا ولا المسيح؟، وسوف أحكى قصة ونعرف منها الإجابة".
وأضاف البابا تواضروس الثانى فى عظته بدير الأنبا شنودةLachiarilla بميلانو: "كان فى ولد عمره 10 سنين فى يوم وجد صوت بيقول له صباح الخير، وكان بيدور علشان يعرف منين الصوت، لاقاه من الشجرة، وبتقول له مضايق ليه؟، فقالها أصل مش لاقى حد ألعب معاه، ففضلت تفكر الشجرة، وقالت له طيب اطلع على الفرع بتاعى واجلس عليه واتمرجح، وفعلا طلع وجلس وفضل يتمرجح، مين مبسوط أكتر الولد ولا الشجرة؟، عدت سنوات وبقى الولد عنده 15 سنة، وهو ماشى وجد الشجرة بتقول له مالك متضايق ليه؟، قالها أصل مش معايا فلوس؟ فقالت له خلاص هات سلة واجمع فيها من ثمارى وبيعها فيبقى معاك فلوس، وفعلا عمل كده وبقى معاه فلوس، مين مبسوط أكتر الولد ولا الشجرة؟".
وأضاف البابا: "الولد كبر، وبقى شاب، فقالت له الشجرة أنت فين ليا كتير ماشوفتكش؟ قال لها ده أنا اتخرجت وهاتجوز وزعلان علشان مش لاقى شقة، سكتت الشجرة وقالت له هات منشار واقطع فروعى، وحطهم مع بعض واعمل شقة خشب، فعجبته الحكاية أوى، وقطع الفروع وعمل شقة خشب، مين اللى مبسوط الولد ولا الشجرة؟، اتجوز الولد وبقى عنده ولد وبنت، ولد اسمه مينا، وبنت اسمها مريم، وفى يوم وهو بيتفسح على النيل فى مصر، الشجرة بتسأله مالك ومين دول قالها، دول أولادى ومراتى وعايزين يتفسحوا ويركبوا مركب فى النيل ومش عندى، فقالت له روح هات منشار كبير واقطعنى واعمل منى مركب، وفعلا قطعها وعمل مركب ومجداف واتفسح هو وولاده ومراته، مين اللى مبسوط الولد ولا الشجرة".
وتابع البابا تواضروس: "عدت السنين وكبر الولد وبقى عجوز، وهو ماشى سمع صوت بيقولوا أنت فين؟ فقال مين؟ قالت له أنا لما كنت شجرة وقطعتنى وعملت منى مركب فقالها العيال كبرت وعايز ارتاح قالتلوا تعالى اقعد على الحتة الصغيرة اللى اتبقت منى، مين مبسوط الولد ولا الشجرة؟ فكان لديه خمسة مشاهد فى القصة من وهو طفل لغاية ما أصبح عجوز، مين مبسوط الولد ولا الشجرة، مين يفرح اللى بياخد؟ ولا اللى بيدى؟، الآية تقول (مغبوط هو العطاء أكثر من الأخذ)، اللى بيعطى فرحان أكتر، مثل الشجرة، مرة ثمر، وبيت، ومركب، وكرسى للراحة".