ابنة رمزى الشبينى المتهم فى "جواسيس الغواصات": "أبويا غلط ولما حس بغلطته سلم نفسه".. و"إحنا منعرفش اللى اسمها سحر دى غير من الجرايد".. و"هو سافر إيطاليا زى أى شخص علشان يحسن ظروفنا المادية"

بحزن وانكسار تحدثت "ك" ابنة رمزى الشبينى جاسوس الغواصات الألمانية ل"اليوم السابع"، رافضة ذكر اسمها، أو تصويرها أثناء تواجدها بقاعة محكمة جنايات القاهرة بالتجمع الخامس بصحبة أحد أقاربها فى انتظار جلسة محاكمة والدها المتهم بالتحسس لصالح الموساد الإسرائيلى مع المتهمة الثانية سحر إبراهيم سلامة وضابطين بجهاز الموساد الإسرائيلى، فى القضية المعروفة إعلاميا ب"قضية الغواصات الألمانية"، والتى صدر قرار بتأجيلها لجلسة 31 يناير، لعدم حضور المتهمين من محبسهم.
"أبويا كان بيعمل علشانا حاجات كتير وكانت علاقته حلوة بالناس كلها، وكل الناس بتحبه، وهو سافر إيطاليا علشان يشتغل زى أى شخص لكى يحسن من ظروفه المادية، ولكى يصرف علينا، ولما سافر كان بيبعتلنا فلوس بس مش كتير علشان مكنش بيشتغل على طول هناك، وفى الفترة الأخيرة لما رجع آخر مرة قعد معانا فترة كبيرة، وقالنا إنه مسافر يدور على شغل، ومن ساعتها معرفناش عنه حاجة غير بعد 6 شهور عن طريق التليفزيون عرفنا إنه متهم فى قضية تجسس وتخابر مع الموساد الإسرائيلى".
"وإحنا عرفنا أنه هو اللى سلم نفسه، وقدم مذكرة للمخابرات علشان عرف بغلطته وحس بيها، وعمل كده علشان يصلحها، إحنا بقالنا كتير بندور عليه علشان نشوفوا ونطمن عليه ومش عارفين نوصله حتى المحامى مش عارف يقعد معاه، وأنا نفسى يحضر الجلسة النهارده علشان أشوفوا وأسلم عليه، دى أول جلسة نحضرها ونتمنى أنه ييجى وكل حاجة عرفناها عنه من ساعة ما اختفى كنا نعرفنا عن طريق التليفزيون، ومحدش من الأسرة يعرف لغاية دلوقتى مكانه فين، وأنا عرفت امبارح بالصدفة من المحامى أن عنده جلسة النهارده ومقولتش لأى حد".
"إحنا منعرفش أى حاجة عن اللى اسمها سحر دى غير من وسائل الإعلام، وهى اللى كانت بتكتب التقارير، وأبويا كان دوره أنه يوصل بس، هو غلط بس لما حس بالغلط راح سلم نفسه علشان يصلح الغلط ده، والمفروض المحكمة ترأف بحالته علشان سلم نفسه، وعلشان هو كمان اللى مقدم البلاغ، ولم يتم القبض عليه وكل التحريات اللى اتعملت كانت بعد كده".
"إحنا اتأذينا لأننا أولاده، وكل الناس اللى اتكلمت فى الجرايد وقالت إنه بلطجى وبتاع مشاكل إحنا منعرفهمش ولا حتى ساكنين جنبنا، ولم نتعرض لأذى من أى شخص وعلاقتنا بالجميع لم تتغير ومستمرة".
موضوعات متعلقة:
تأجيل محاكمة جواسيس الغواصات الألمانية لجلسة 31 يناير الجارى