نص تفريغ تسجيل مكالمة وجدت مع الجاسوس الاسرائيلي!

نص تفريغ تسجيل مكالمة وجدت مع الجاسوس الاسرائيلي!
http://phosphoricblog.blogspot.com/2011/06/blog-post_14.html
هذه تدوينة ساخرة, وكل ما ورد فيها هو من خيال المؤلف,
كل اللي مكتوب هنا مش حقيقي ومجرد هزااااار اوعو ياجدعان حد يصدق وتودونا في داهية الله يكرمكم!
____________________________
تمكنت مصادرنا المطلعة في نيابة امن الدولة العليا من الحصول على تفريغ المكالمات بانتداب لجنة من الاذاعة والتلفزيون من العدة الصيني التي وجدت مع الجاسوس, وكان هذا نص المكالمة بين شخص يدعى طوال المكالمة بالجاسوس وشخص آخر يدعى بنيامين ابن تينياهو:
بنيامين ابن تينياهو: الوووو الووو الصوت مش واضح يا جاسوس, سامعني؟
صوت ضوضاء
الجاسوس: معلش يا ريس اصل زئردة هرب من الحجز بعد ما انا ولعت قسم الخليفة مع شباب الحي, والراجل النهاردة دابح العجل اللي سرقه اول ما خرج من المدبح اللي ورا القسم, وجه هنا عمل هيصة تحت وماشي بيطبع خمسات بدم العجل عالحيطة.
بنيامين ابن تينياهو: الووو الصوت مش واضح يا جاسوس, انا بنيامين ابن تينياهو باكلمك من تل ابيب - خمسة شارع ديفيد بونجوريون من ادام عم شامير بتاع السفنج, انت اتجسست ولا لسه؟
الجاسوس: ادينا شغالين يا كبير وربنا يسهل
بنيامين ابن تينياهو: خللي بالك وانت بتتجسس عشان الكاميرا اللي معاك دي عهدة, ممكن يدفعوك فيها خمسين الف شيكل
الجاسوس : ماتخافش يا باشا, انا واخد بالي كويس من ساعة ما اتثبت في العدة القديمة وانا باتجسس في ابو قتاتة
بنيامين ابن تينياهو: الموبايل اتسرق منك يا خايب, انت هتضيع شوية الشيكالات اللي بنحولهالك على حساب رقم 3553761345-ج س؟ , ده شمعون قعد ست شهور في مصر كان ناقص يجيب شريط المترو وهو راجع, وانت رايح تتثبت يا وكسة!, يا اخي ...سباب بذئ يرجح ان بينيامين يسب الدين اليهودي للجاسوس, المهم طمني بتتجسس كويس؟
الجاسوس: وباعمل فتن طائفية كمان يا باشا
بنيامين ابن تينياهو: عال عال, عملت كام فتنة النهاردة؟
الجاسوس: طائفية ولا سادة هاهاها.. عامة النهاردة ما عملتش كتير, الجو كان حر اوي, صحيح حضرتك ماتعرفش يعكوف عوزي عمل ايه في طلب تركيب التكييف؟
بنيامين ابن تينياهو: انت هترغي يا الفاظ بذيئة باللغة العبرية, انجز يا تلاجة قولي حرقت القسم ازاي؟
الجاسوس: جبت جماعة مسجلين خطر من الفئة الف وباء, ورمينا قنابل موتولوف على القسم يوم الجمعة الموافق 28 الساعة الخامسة مساءا وست دقائق, بعد ما علمتهم يعملوها ازاي, والسبرتو اشتريناه من محل عم خميس في 6 شارع القلعة, والقماش من محل سوستة الترزي اللي في 8 نفس الشارع وسيبتله الكارت بتاعي, وبعد ما خلصنا حرق في القسم طلعنا على ماكينات الايه تي ام.
بنيامين ابن تينياهو: كويس كويس, حد منهم حس انك يهودي اسرائيلي صهيوني ساكن في 23 شارع كوهين الاعمى؟
الجاسوس: لا, وانا صورت كل حاجة ورفعتها على الفيسبوك وعملتلك تاج فيها.
بنيامين ابن تينياهو: بس انا مش عندك على الفيسبوك من ساعة ما اتريقت على صورتي في المصيف, عملت تاج ازاي؟
الجاسوس: عادي يا ريس زي التاج اللي عملتهولك في البوم صوري وانا باحرق مقار امن الدولة وفيديوهاتي وانا باحرض على الفتنة الطائفية تلات مرات, مش انت برضه اللي عامل اكونت ... اسم اكونت ضابط مخابرات مصري مسؤول عن مراقبة الجاسوس
بنيامين ابن تينياهو: يا نهار ازرق, ده مش انا يا اهبل, عملت تاج لمين الله يخرب بيتك!
الجاسوس: ماتخافش يا تينياهو بيه, تلاقيه بس جلعاد ابن خالتي بيعمل في مقلب ولا حاجة, انا هابعتلك الرسالة بالبريد على مقر الموساد في تل ابيب.
بنيامين ابن تينياهو: طيب طمني عملت ايه كمان؟
الجاسوس: علمت مجموعة من شباب الثورة ازاي يشيلو عسكري الجيش من الدبابة في تلات خطوات بس عفاف شعيب الله يخربيتها عرفت الخطة وفضحتنا على التلفزيون!.
صوت خروشة
الظاهر الشبكة بتقطع يا باشا, هاكلمك تاني بعد ما افرغ شحنة السم في ازايز دوا الكحة, ماتنساش تسلملي على الحبايب وحياة الشمعدان ابو سبع شمعات ما احنا يهود بقى هاهاهاها
صوت ضحكة شريرة متقطعة