الفيس بوك: احنا آسفين يا جاسوس

شهدت صفحات فيس بوك وتويتر ردود أفعال واسعة بعد نشر خبر إلقاء القبض على الجاسوس الإسرائيلي. وتنوعت ما بين التعليقات على الصفحات الشخصية، وتدشين صفحات خاصة "ساخرة" حول الجاسوس، منها "احنا آسفين يا جاسوس"، و"قصة جاسوس"، وIlan Grapel جاسوس وأهبل وزمباوى كمان"، و"إنت عيل جاسوس"، و"الصفحة الرسمية للجواسيس فى مصر"، وغيرها.
ومن على صفحات فيس بوك نعرض لهذه التويتات والتعليقات الساخرة:
- توفيق عكاشة ينسحب من الانتخابات ويرشح الجاسوس، ويؤكد: الجاسوس اتصور مع المصريين أكتر من البرادعي (وبيعرف يزغط بط)، ومعي الدليل.
- ماشي عرفنا إنكم مسكتو جاسوس...برافو... وبعدين؟ عاوزين الجاسوس اللي في شرم معلش احنا بنتكلم.
** يا ريت الموساد ما يعملش وقفه احتجاجية ويقول احنا عاوزين أخونا الجاسوس
** يا جاسوس نام وارتاح, يوتيوب هتكمل الكفاح
** الجاسوس لديه صورة ممهورة بتوقيع البرادعي وجدت في جيب بنطلونه الليفيز الماسوني
** الإسم الإعلامي للقضية دي لازم يبقي "الجاسوس الأهطل"
** إن كان أدهم صبرى "ن1" فالجاسوس دا "أ1" ال أ يعنى أهبل من نوعه وال 1 يعنى ابن المجنونة أول واحد يعمل كده تمام كده مش ناقص غير سونيا جراهام.
** يعني إيه كوك زيرو: يعني المخابرات تقول للشعب قبضنا على جاسوس والناس تدافع عن الجاسوس
** الجاسوس الحق..هو من يتجسس عشان يتصور مع الدبابة, ثم يهدأ ليرفع الصوّر على الفيس
** النيابة: إنت جاي تتجسس وللا جاي تهرج؟.. الجاسوس :أنا جاي أهرج
** من الجاسوس الإسرائيلي إلى الشعب المصري .. نشكركم على حسن تعاونكم .. بجد صورتوني أحلى صور في حياتي.. أموووووه
** مانشيت تعبيرى: دفاع الجاسوس: موكلى برىء لأنه بياكل ماكدونالدز مش كنتاكى... والإدعاء يرد: كان يموه ليخفى نواياه الإجرامية).
** ريبا في اليوم السائع: صور الجاسوس مع صباعه البمبي واكيد طالما جاسوس يبقي قال "لأ" للتهديلات علشان الاستقرار"
** الجاسوس الإسرائيلى كان جاى يطمن على الثورة إية المشكلة العيب فى الدولة اللى تبقى مفتوحة لكل أجهزة الاستخبارات تلعب فى أساسها
** الموساد قام بعملية استخباراتية دقيقة وقفل البرايفسي أوبشن بتاع الجاسوس علشان ما نعرفش أصحابه على الفيس بوك - حفاظاً على بقية الشبكة.
** وقبل القبض على الجاسوس الإسرائيلي خرجلنا محمد صبحي ع التلفزيون مشككاً فى مستخدمي الفيسبوك إنهم ممكن يكونوا إسرائيليين وإسمهم كوهين كمان.
** الجاسوس اتمسك بغلطة في معلومة كان هيكتبها استاتس ع الفيس جه يعمل تاج للمخابرات الاسرائيلية عمله للمخابرات المصرية"
** وبمناسبة الجاسوس إمتى هانحاسب الجاسوس الكبير اللى باع الغاز للإسرائليين وقفل المعبر وخنق مصر سنيين وقتل ثوار وعذب مسلمين قبل مسيحيين
** الجاسوس كان هنا في الأساس عشان يتأكد إن الزمالك ما ياخدش الدوري
** فين جروب الراجل اللي ورا الجاسوس؟
بيقولك الجاسوس الاسرائيلى : كان مسجل نتينياهو على الموبايل
.
.
....
.
....
.
.
نتينياهو مهمة
- عاجل : تدهور حالة الجاسوس النفسية .. وأنباء عن نقله لمستشفى شرم الشيخ لتلقي العلاج.
- عرض الصيف: أحدث الأدوات الجاسوسية بأقل الأسعار
تجدها عندنا قبل أي حد تاني والمفاجئة الكبري
اشتري عرض أحدث أدوات الجاسوسية وخد عليه جاسوس بنتيوم فور هدية