الله يرحمك يا فلانتين

يأتى عيد الحب فى كل عام حاملا نسمات حانية يضعها كل حبيب لمحبوبه فى نظرات و همسات وكلمات.
بصراحة من غير مجاملة مش عايز أكتب بقى بنظام الكتابة الناعمة وحين تنظر لعيناها وكلمتين حب من إياهم.
إيه رأيكم لو أتكلمنا فى عيد الحب عن أنه حلال ولا حرام؟ أكيد هتقول عليا إيه العكننة دى وإيه اللى مخلينى قاعد اقرا اللى هتكتبه.. ما ترسى على بر وتقول أنت عايز تكتب أيه؟
حاضر يا سيدى من عنيا يا سيدتى هقولك: إن شيوخ الفضائيات قالوا: إن عيد الحب حرام وإنه دعوة للكفر وإن هنا ك أحاديث شريفة للمصطفى عليه الصلاة والسلام فيما معناها أن الأعياد للمسلمين عيدين فقط هما عيد الأضحى وعيد الفطر.
و لأننى أحب أن يكون المجال لأهله فى تخصصه فإنى أرجو من هؤلاء الأفاضل أن يجيبوا و لماذا لا نقول على أعياد 6 أكتوبر وعيد تحرير سيناء أنهما أعيادا غير دينية ولا يصح التمسك بهما؟
و بالطبع سترد على أن هذه مناسبات وطنية وقومية و يجب الزهو والافتخار بها.
و ماذا عن عيد الأم.. أليس هذا العيد عالمى وابتدعه الغرب؟ و هل الأم تستحق منا يوما يتيما فى السنة؟ وهل هذا يناسب ما جاء فى القرآن الكريم ببر الوالدين معا؟
رحم الله الشيخ محمد عبده، العالم المستنير الذى سبق عصره وكان خير الناس فى توصيل منهج الإسلام الوسطى إلى الجميع.. بالفعل افتقده فى ظل سيطرة هؤلاء المشايخ على عقول البسطاء عبر الفضائيات.
أتعجب أن يكون هذا اليوم المسمى بعيد الحب هو يوم للإلحاد و الكفر، و إن كان يقتصر فى الفكر على أنه علاقة حميمة بين الرجل والمرأة فإنه محترم طالما فى إطاره الشرعى.
و ياريت تسيبك بقى من جو الأحمر فى الأحمر والورود والشيكولاتة والدباديب والبراويز وغيرها من الهدايا التى لا تعد ولا تحصى.
إيه رأيك لو خلينا عيد الحب يوم الناس تتصافى وتتصالح مع بعضها جيران وصحاب وأهل وأحباب.
يوم نشوف فيه الناس قلوبها صافية مش مجرد ابتسامات وأحضان واللى فى القلب أسود ولا قرن الخروب.
يوم نشوف المحتاجين ونساعدهم ونطبطب على الفقراء ونسعدهم.
يوم نفرح فيه ونسعد بعضنا خصوصا وأن الفرحة قليلة عندنا وبتظهر يوم ما المنتخب يكسب وده كل سنتين.
أظن لو عملنا كل ده فى حدود العرف والدين و التقاليد والعادات مش هنغضب ربنا.
لماذا يقتل شيوخ الفضائيات السعادة؟ ولماذا لا يتصل شجيع من الجمهور ويسألهم عن حكم الدين فى بعض ضباط المرور المرتشين أو عن إهانات بعض الضباط فى الأقسام للمقبوض عليهم أوعن حكم الدين فى إجازات عيد الثورة والشرطة.. إلخ من أعياد؟ وممكن يقطعوا الخط لو يجيبوا عن صاحب هذا السؤال.
طبعا حاسس إنك فى محاضرة وإن زقططة الفلانتين ضاعت عليك.. متزعلش حقك عليا وكل سنة و أنت طيب وافتكر تدعى العم "فلانتين" اللى راح فى الكازوزة بسبب العشاق، وكم من الجرائم ترتكب باسم الحب؟ و متنساش زى ما اتفقنا إنه عيد حب للجميع مش لوحدكم و بس.. والله يرحمك يا فلانتين.