"عم إبراهيم" مثقف يحمل 3 شهادات و"ترزى" 70 سنة خبرة

داخل محل صغير ممتلئ بالكتب فى إحدى حارات القاهرة القديمة، يجلس عم "إبراهيم"، أمام ماكينة خياطة داخل محل الكتب، جمع بها بين مهنته كترزى، وبين جبه وعشقه للكتب، التى تعلم منها اللغات، والتى يبادرك بأحدها متسائلاً عن اسمك بمجرد دخولك فيقول Hello..what is your name، ويواجه دهشتك بتبرير سريع قائلاً: أنا بتكلم إنجليزى وفرنساوى كويس أوى.. وحافظ القرآن الكريم، ومعايا 3 مؤهلات عليا وبشتغل خياط من سنة 1940».
يتحدث عم إبراهيم عن سبب عمله بالخياطة بالرغم من حصول على ثلاثة شهادات عليا فيقول: أنا مشهور هنا فى المنطقة باسم الشيخ إبراهيم الخياط، وأسمى الحقيقى أبو اليزيد عبد الحليم، ولما اتخرجت من ثانوى جالى تعيين فى الهيئة العامة للتأمينات الاجتماعية وكان المرتب 12 جنيها فى الشهر ووقتها مقدرتش أكمل فى الوظيفة عشان مرتبها قليل وكمان فى إيدى صنعة متعلمها من وأنا صغير عشان أصرف على نفسى، فقلت أشتغل فى الخياطة أفضل وكملت دراسة عشان أتعلم مش عشان وظيفة.
يكمل "عم إبراهيم" الحديث عن مشوار حياته قائلاً: حصلت على شهادة بكالوريوس التجارة وليسانس حقوق من جامعة عين شمس وليسانس أصول دعوة ودين من جامعة الأزهر، ومعايا شهادة من الأزهر إنى قارئ قرآن وياما قريت زمان بليالى رمضان مع شيوخ كبار زى الشيخ مصطفى إسماعيل ومحمود على البنا ومحمود صديق المنشاوى بليالى رمضان وسافرت معاهم محافظات مختلفة فى مصر.
عندما تدخل محل عم إبراهيم تعتقد إنك ستجده مليئا بماكينات الخياطة والقماش باعتباره محل ترزى لكنك ستتفاجأ، بعدد كبير من الكتب المختلفة مثل كتب دينية وعن اللغات وعلم نفس فيتحدث عم إبراهيم عن هذه الكتب قائلاً: "أنا بحب أقرا الكتب وعندى أنواع كتير منها وكتب لغات كمان لأنى بعرف أتكلم فرنساوى وإنجليزى".
وأضاف: كنت الأول بصمم جلابية وبنطلون وقميص لأن الناس زمان كانت بتحب تفصل وكانت الجلابية وقتها بتتفصل بقرش لكن دلوقتى الناس بتفضل شراء الجاهز عن التفصيل مبقاش فيه شغل دلوقتى عندى أولادى متعلمين، لكن محدش فيهم فكر يتعلم صنعه جانب شهادته بس لو حد فيهم عايز إنه يكون زيى أنا هوافق لأن الصنعة هى اللى بتفضل مع البنى آدم وبتكسب فى وقت ما يكونش فيه وظيفة.
واختتم عم إبراهيم البالغ من العمر 85 عامًا، حديثه قائلاً "آخر أمنياتى إنى أحج قبل ما أموت وأرجع أقرأ قرآن فى الجامع زى زمان".