"بنحب بعض"

آه من أشواقنا...آه من إحساسنا
واحنا بنحب بعض
لكن أشياء تقابلنا.. تمنع طرق وصلنا
وتبنى ما بينا البعد
بنحب بعضنا والله
وأشواقنا قلناها غناوى
وما دمتى راضية وأنا راضى
يبقى بهوانا نتحدى الكون
هو:
أبويا لما قولت له.. قالى وماله يا ابنى
وأمى صرخت بالقوى.. تحرم عليا يا ابنى
هى:
أمال أنا أعمل إيه.. لما الاتنين يعارضو
أنا عايشة فى نار.. أهالينا لازم يسايسو
هو:
أهالينا رفضوا أشواقنا... وحاولوا هد أحلامنا
والدنيا مفتوحة قدامنا.. نستنه إيه
هى:
لا يا حبيبى نستنى.. كلمة مبروك ناقصة لنا
زغرودة تسبق أيامنا.. وتفتح بيبان
هو:
لا تقولى أبويا ولا أمى.. هوانا أهم يا عمرى
لو كانوا فاكرين سعادتنا.. يقفوا فى طريقنا ليه
هى:
أكيد فى يوم راح نتفاهم.. رضى أهالينا لازم لازم
اصبر يا حبيبى ولازم .. هيكون فى حل لحكايتنا
هو:
أنا كل لحظة تعدى بموت.. وحاسس إنى هتججن
ما الفرحة اللى طلعت لها.. بنزلها من أول سلم
هى:
مشوارنا لسه فى أوله.. ابعد عن اليأس وسيبه
يا حبيبى يا مثلى الأعلى.. ولا الأمل أنا هفقده
هو:
أدينى قاعد مستنى.. أدعى ربنا وأصلى
وارفع إيديا وادعى له.. يا رب حلها من عندك
هى:
الله عليك كده فى الإيمان.. يا حبيبى ادعى كمان وكمان
وهرفع إيديا وادعى معاك.. يا رب حلها من عندك
هو وهى:
بنحب بعضنا والله وأشواقنا قلناها غناوى
وما دمتى راضية وأنا راضى
يبقى بهوانا نتحدى الكون