سِتْ الكُل وَاكْتَرْ

جميلة كل يوم
و أجمل فى يوم عيدها
حمالة الهموم
و صاينه مواعيدها
...............
تِرَضَّع تِكَبَّر
تِسَمِّى الله اكبر
و تاتا تاتا تاتا
النونو يمشى يِكْبَر
و وجباته التلاته
من ايد عسل و سكر
.................
مين فى الدنيا أغلى
مين أحن و أطهر
غير الغالية أمي
ست الكل و أكتر
...............
لو ع المحبة بحر
و لو ع الصبر تُصْبُر
وف عطاها نهر
مفيش لأَه و ما أقدر
و لو بدعاها عايشه
العمر تِدْعِى تِسْهَر
ولو ع الشهد دايما
تلاقيها مِسك عنبر
............
يبقى ازاى تنساها فى عيد
وهى تحافظ ع المواعيد
ومفيش ليلة يجيها النوم
لو سهران أو كنت بعيد
...............
فاكر اللفة وانت زمان
قبل ما حتى تحس بجوع
تجرى و تديك رضعة كمان
فاكر وقت ولادة و سبوع
وللا نسيت غاوى النسيان
حتى وانت كبير غضبان
هى تهدى بكل حنان
...................
يبقى ازاى هترد جميلها
طول العمر تعيش و مُدان
عمرك ما هتعمل عمايلها
و لو بصحيح جواك انسان
قوم ارضيها قوم ادعيلها
احفظ ديْنّهَا فى كل مكان
يالا بسرعة اجرى و بوس ايدها
رُد الدَيّنْ و ارْضِى الديان