حلمك على قدك

كل واحد مننا من حقه يحلم حلم وردى أو رمادى بس يحلم
فى حاجات ممنوع تفكر بس فيها وإن حلمت اوعك تهوب مرة ليها
مش حاقولك ما انت عارف كل حاجة وأنت مصرى زينا مانتش خواجة
لما تلقى الأمر يتعلق بباشا أو بهانم بنت بيه أو بنت باشا
أو بواحد ماللى طالعيين ف المقدر واللى عامل فيها نفسه راجل اخضر
أو بكلب من الكلاب المخملية اللى تعرف امتى بس تكون وفيه
أو بقطة كبيرة مالنوع السيامى ليها ضهر وضهرها واحد حرامي
أو كاناريا بغبغان مالزنجبارى اسمه ماشى فى البنوك وحسابه جاري
أو طاوس منفوش وريشه بهبهانى لو تشوفه تقول دا هندى أو إيراني
أو حلمت بقصر من أيام زمان والصور ويا التحف ماليه الحيطان
لو لقيت خرفان بتجرى وانت بينهم تجرى والجزار وراها لحد زينهم
بس عاوز يمسكك ويطول رقابتك مش حايرحم دمعتك أو حتى شيبتك
فك نفسك واجرى منه ف الميدان أو ف حارة قبل ما يفوت الأوان
وأن لقيت الحارة سد ارجع أوام وانسلت منهم وزوغ ف الزحام
وامشى جنب الحيط وماتبصش وراك واوع تمشى والبطاقة مش معاك
وان لقيت واحد ومسكك من قفاك اصحى من نومك وبطل تانى تحلم