إلى صابر.. إنسان مصرى بسيط

صباح الفل يا صابر
على عيونك.. صباح الخير
يا مستحمل وبتعافر
وأنا بدونك.. ماكونش بخير
وحافظ م الكلام حاجتين
نعم حاضر
تملّى مراعى للعشرة وللقوانين وللخاطر
وعايش ع الكفاف صابر
وعارف إن مكتوبك على جبينك
ها يجى اليوم وهاتشوفه قصاد عينك
ومهما يمر فى سنينك
أديك راضى ومطمن وشايف
إن فيه الخير
زنازين الغلا والفقر سجنينك
ومابين الرضا والقهر حابسينك
تبص يمين تلاقى سور على يمينك
تبص شمال تلاقى سور على شمالك
وحالك.. هو ده حالك
وبلع الضيقة راسمالك
وعشت المر ع الآخر
مابين طلة رئيس ورئيس بتتحير
ولا شىء من أساك ياتعيس بيتغير
يطول الهم من قوتك ومن يومك ومن عمرك
لكن مايطولش من صبرك
بتصبر صبر واللهِ مالوش آخر
لو اتقدر
لايملى خزاين الدنيا أمل يسرى
مابين تنهيدة ومشاعر
وأقولك إيه يا صابر
صباح الفل