دا المصرى !!!

أنا المصرى
سابق عصرى
كل زمان
بس الان
بقيت اخر واحد فى الصف !!!
صف طويل
مالوش اخر
بقيت عويل
وف الاخر
وبقيت وحدى بدور وبَلِف
ابص يمين
ابص شمال
اقول يامين
عم وخال
ماكل الناس سبقونى
وكل اخواتى باعونى
وادونى كمان 100 كف !!!
كنا زمان
ايد واحده
كل مكان
فيه وِحْدَه
وكان خيرنا مكفينا
وهدمتنا تدارينا
وكان مسلم مع مسيحى كف فِ كف
صحيح دوقنا
ف يوم الظلم
وكان حالنا
كأنه شؤم
وقلنا اوماله نتحمل ويمكن بكره تتعدل
وطفح الكيل
وخلص الصبر
وشوفنا الويل
ودوقنا المُر
وقولنا خلاص لازم بكره يكون اجمل
وف التحرير
كان صوتنا
نِدا التغيير
فداه موتنا
وشلنا نظام وجالنا اخوه واتارى الحال مابتبدل
عشان كرسى
او منصب
فيه يِرسِى
بقا يُنصب
ولاقينا الكل متقسم مابين كاره ومتعصب
ويجى الدور
تانى ويلف
ويبقى الدور
على اللى التف
ونرجع تانى من تانى لنقطة صفرمحلك سر
ولا اتغير
ف يوم حالنا
وبقى صُغير
قوت اعيالنا
وكل الناس بتسبقنا ومالحقنا مكان ف الصف
منا المصرى
سابق عصرى
كل زمان
بس الان
راح دورى وبقيت اخر واحد فى الصف !!!!!!!!!