ساحر متجول طرده أصحاب السيرك فحول كل الشوارع إلى سيرك متنقل

ويحلم بتكوين فرقة تجوب الشوارع..

يدفع شنطة سفر صغيرة أمامه تحوى "عدة الشغل"، ويجوب بها الشوارع التى يتخذ منها سيركاً متنقلاً، يقدم فيه ألعابه السحرية للمشاهدين الذين تستوقفهم عروضه المبهرة فيمدون أياديهم فى جيوبهم ويلقون بعملاتهم المعدنية فى القبعة التى يمررها عليهم بعد أن ينفد ما فى جعبته من الحيل.
محمد سليمان "الساحر المتجول" يعيش على هذا الحال منذ عامين بعد أن اختلف مع مسئولى السيرك الذى كان يعمل به "مساعد ساحر" ويشرح أسباب تركه للسيرك الذى عمل فيه لأربع سنوات "أول ما طلبت منهم أعمل فقرة خاصة بيا نطرونى برة السيرك رغم أنى اتعلمت كل الحيل فى الأربع سنين اللى اشتغلت فيهم مساعد لفنان ألعاب سحرية، وبعدها قررت اشتغل مع نفسى، وبيطلبنى ناس فى حفلات خاصة وأعياد ميلاد وحفلات مدرسية ولما محدش بيطلبنى بنزل أنا ألف على الناس فى الشوارع".
"شكالاى بكالاى يا محمد يا فنان متعنا كمان وكمان".. بهذه العبارة يبدأ محمد صاحب ال27 عاما ودبلوم الفنون الجميلة كافة عروضه، ومن خلالها حصل على اسم شهرته "محمد الفنان" وسط زبائنه وأهل منطقته بمنشية ناصر، ويتحدث عن أهم فقراته "أكتر لعبة بتعجب الناس المنديل اللى بولعه فبيتحول لحمامة، والكورة اللى بخبيها وأطلعها من جيب حد من اللى واقفين، ولعبة الأرنب السكران اللى بيطلع من الطاقية، والكوتشينة المكارة ودى ب6 كروت بس، والتانية الكوتشينة الشقية بكل أوراق الكوتشينة"، وهى كلها ألعاب تعتمد على خفة اليد.
رغم أنه "ساحر متجول" إلا أن لديه الكثير من الطموح "نفسى يبقى ليا فرقتى ويكون فيها أراجوز وعرايس زى أسبونج بوب وكرومبو والشخصيات اللى بيحبها الأطفال، ويبقى ماشى معايا دى جى ونعمل عروض فى الشارع للناس، عشان نخفف عنهم النكد اللى عايشين فيه".
أكثر ما يحبه "محمد" فى مهنته هو قدرتها السحرية على تحويل التكشيرة التى يحملها كل شخص على وجهه وهو يسير فى الشارع إلى ابتسامة واسعة "حبيت شغلى أوى بعد ما عملت عرض فى عيد اليتيم للأطفال وشفت الفرحة فى عيونهم ورفضت ساعتها أخذ فلوس، وده أهم مكسب لى فى أى عرض بعمله فى أى مكان".
بمجرد أن يفتح محمد شنطة الأعاجيب ويقول عبارته السحرية "شكالاى بكالاى" يلتف حوله المارة فى دائرة واسعة ويصفقون عقب كل حيلة يفعلها بنجاح "لما الناس بتشوف العرض بتحطلى أى حاجة فى الطاقية بتاعتى زى نظام بلاد برة، وفى ناس كتير بياخدوا رقمى عشان حفلات خاصة"، ورغم صعوبة كونه ساحر متجول إلا أن يرى فى ذلك عدة ميزات "اللف فى الشارع بقدر ما هو مرهق لكن بيعملى دعايا وبيفتح لى أبواب رزق وبتمشى، وأنا داخل على جواز ولازم اتصرف وأكون نفسى".