فضفض.. وفضى جيوبك!!

هجمة شرسة على فلوس المصريين الغلابة ويا ريت من النشالين بتوع زمان، نشالين الأوتوبيسات والأسواق ويا ريت من البلطجية واللى لسة واقفين بالسنج والمطاوى قرن الغزال، ولكن للأسف هجمة شرسة شيك بدأت من عدة سنوات مع ظهور القنوات الفضائية الخاصة والتى تتمتع بهامش كبير من الحرية وتدافع عن المظلومين، وتوصل أصوات المساكين للمسئولين وتنقد وتلعن الصغير والكبير من الغفير لغاية الوزير واستغلوا إعجابنا بالحرية، وتوصيل مشاكلنا ووضعوا أيديهم فى جيوبنا.
أولا.. مسابقات هايفة أرباحها بآلاف الجنيهات وبعضها بآلاف الدولارات بس اتصل ب 09000 على أى تليفون أرضى أو من أى محمول 17 والدقيقة بجنيه ونصف واللى جرب الخدعة تكلفت المكالمة حوالى 50 جنيها، ولك أن تتصور يا عزيزى القارئ أن تعداد المصريين 78 مليون واللى تحت الفقر 40 % فلو حسبنا اللى على خط الفقر واللى تحته بشويه واللى فوقه حبة يطلعوا حوالى 5 ملايين وكلهم فى أشد الحاجة لقيمة المسابقة، وبعضهم يحلم بالفوز ليرى الكام ألف ويتحسسها بيده قبل ما يموت وهذا يعنى أن المبلغ الذى يصل للقناة 250 مليونا جنيه فى كل مسابقة والقناة لا تكتفى بمسابقة واحدة، ولكنها تخترع مسابقات ومسابقات ومسابقات مثل كورمبو ومين اللى دخل الجون وتوقعاتك بنتيجة المباراة وسنختارك لتحضر كأس العالم، وسنختارك لبرنامج الخوف فى الأرجنتين – وكأن مصر مفيهاش أماكن للهجص اللى بيعملوه – ورشح الفائز وأشكال وألوان ويبدو أنه تنظيم كعصابات المافيا بس لطيف وظريف فبدل ما نقتلهم وناخد فلوسهم لا نلاعبهم ونضحكهم ونمص دمهم، والمؤسف أنهم فى النهاية ومع ظهور نتيجة المسابقة يستخسرون يكسبون واحدا ولا اثنين من المساكين سكان خط الفقر، ولكن يعلنون أن الفائز محمد على حسنين مصر القديمة أو رجب السيد عبد الدايم المنيا ولا فيه واحد اسمه محمد ولا فيه واحد اسمه رجب.
ثانياً.. برامج جميلة اسمها فضفضة وفيه فضفضة مذاعة وفيه فضفضة من تحت لتحت بين المذيع والمتصل أو المتصلة وطبعاً أى كلام فاضى لا يودى ولا يجيب ويفضل المذيع يجرجر المتصل فى الكلام.. وبعدين وأيه رأيك فى المكالمة اللى فاتت، طب وأيه رأيك فى رأى محاسن اللى اتصلت امبارح ويفضل المتصل المسكين يفضفض يفضفض لغاية ما تفضى جيوبه، ويمكن ينام من غير عشا.
ثالثاً.. إذا أردت أن تسمن اتصل – إذا أردت أن تنقص وزنك اتصل – إذا أردتى سيدتى معالجة أظافرك اتصلى – إذا أردتى تطويل شعرك ومعالجة تقصفه اتصلى – وإذا وإذا وإذا يعنى مفيش حاجة ببلاش كده.
الموضوع يا سادة يا كرام يا أبناءنا وجيراننا سكان خط الفقر ليست قنوات خاصة، بل هى سبوبة كبيرة، ولذلك نزل فيها رجال الأعمال بإيديهم ورجليهم وهى تربح يعتمد على النصب والاحتيال واستغلال فقر الناس وحاجة الناس وعوز الناس ولو هم وطنيون ويحملون هم هذا الشعب المسكين فيه خطوط مجانية اسمها 0800 ودى خطوط مجانية، ويستطيع المتصل أن يشارك فى المسابقات والمشاركات – نسيت رابعا المشاركات ولوحبيت تشارك بإيميل إنسى ما حدش حيسأل فيك لازم الخط الساخن – ويستطيع المتصل الفضفضة ببلاش وأتحداهم لو حولوا خطوط التسول بتاعتهم ل 0800 المجانية ونسمن وننحف ونعالج أظافرنا وشعورنا ببلاش وندعيلكم.
وللأسف وللأسف ومن المحزن ومن المبكى ومن المزعج أن بعض القنوات الإسلامية وقعت فى هذا المحظور وهى تحتوى علماء أفاضل ويعرفون شروط المسابقات الشرعية والتى لا يساهم فيها المتسابق بأى مليم وإلا صارت قمارا وميسرا.
أناشد الهيئات المختصة بجرائم المال أن تتكاتف مع الهيئات المختصة بالجرائم الإلكترونية مع الهيئة العامة للضرائب أن تكشف مافيا الاتصالات ومن ورائها من النصابين الجدد، وتأخذ الدولة ضرائب هذه الأموال التى تقدر بالملايين وأتمنى أن تستولى عليها كلها لصالح سكان خط الفقر.