من الآخر.. طير أنت

ده مسروق من فيلم "بى دازليد".. ده اللى ممكن تقوله أول ما تتفرج على فيلم أحمد مكى الجديد "طير إنت"، ويا ريت تكون قاعد وسط اصحابك وتقولها بقلب جامد علشان تثبتلهم ثقافتك الهوليوودية، بس اكيد انك مشفتش طير انت من اوله لأن صناع الفيلم كتبين ان فكرته مقتبسة.
مع الاعتبار إن أى فيلم بنقتبسه بنحس واحنا بنتفرج انه بايخ لأنه مسروق، مش ده قصتنا لكن قصتنا هى الفيلم.
طب قبل منتكلم ماتيجى (نعدى) على صناع الفيلم.
احمد مكى – المخرج – اللى على الرغم من اشتراكه فى أدوار صغيرة فى ابن عز-تيتو وإخراجه لفيلم الحاسة السابعة إلا إنه متعرفش كنجم إلا لما عمل دور هيثم دبور فى الست كوم – تامر و شوقية – وفيلم مرجان أحمد مرجان.
ولما اتقال إن فيلم اتش دبور هينزل كبطولة مطلقة لمكى ومن إخراج أحمد الجندى (تانى إخراج ليه بعد حوش اللى وقع منك بطولة أحمد رزق ومحمود عبد المغنى)، اتوقعله النجاح – وفعلا عدا الفيلم بمفهوم إيرادات السوق.
المهم – بعد ما عدا الفيلم، وتألق حلمى كالعادة بأسف على الإزعاج علشان يكون الحصان الأسود.
كان لازم يكون أدام مكى اختيارات:
إنه يقول كفاية فيلم وعدى والشخصية كده جابت أخرها مع الناس وممكن يخلى منها ضيف شرف تزور الأعمال الفنية من وقت للتانى.
أو(وخلى بالكم من أو ده)..
إنه يعمل فيلمه التانى وينافس فيه كل نجوم الصف الأول (بتوع الصيف) وخاصة حلمى.
ومع وجود اسم عمر طاهر ع التتر ...حس الجمهور إنه هيتفرج على حاجة جديدة .مممممممممممممم.
وفعلا اتعملت حاجة جديدة.
شخصية مكى اللى بيلعبها فى الفيلم.. آسف.. قصدى شخصية من الشخصيات اللى بيلعبها مكى فى الفيلم، هى الشخصية الرئيسية (اللى بيطلعلها العفريت-ماجد الكدوانى علشان يحولها لسبع شخصيات مختلفة (شاب الساحل – البطل الهندى – مطرب الجيل –مجرم الصعيد ...إتش دبور ...اللى حطها مكى فى الفيلم (اقتناعا بأنها تميمة الحظ أو عرفان بالجميل للشخصية بس سواء كده أو كده الشخصية كانت فى مكانها ...فى الجون).
قدر مكى –زى آدم (واحد صاحبى) ماقالى قدر إنه يغوص جوه أوى.
سمعت التعليق وقلت أه فعلا ده بجد، قدر مكى إنه بكل شخصية يتابع ويسمع وممكن كمان يكون بيسأل عن أحدث الحاجات اللى بتنزل.. لو فى حاجة اسمها كده .. وفى الآخر بتبقى افيهات مكى من الآخر.
قدرت –دنيا سمير غانم – انها تخليك تصقفلها –مش مصدق ازاى عملت ال 8 أدوار (7 شخصيات العفرتة +شخصيتها الأساسية)، لكن فى شخصية البنت (البياعة) كان إبداع دنيا بلا حدود، وفى كل شخصية كانت دنيا بتاخدك فى دنيا وترجعك تانى.
وأضاف الكدوانى – روح جديدة لشخصية العفريت – مع أنه ساعات كان بيقرب من هنيدى فى عفروتو بس أداء الكدوانى خلاك تنسى كل اللى عملوا الشخصية قبل كده. و تركز مع عفريت واحد بس- العفريت اللى حضروه صناع فيلم –طير انت-
أدى طير إنت لمكى جواز سفر العبور كنجم كوميدى – وفكرة باللى تأشيرتهم خلصت بدرى بدرى (زى هنيدى وسعد) وبالنسبلنا قلنا تمام.
ومستنيين الرحلة اللى جايه لأحمد مكى.
وسائل مساعدة علشان أفيهات الفيلم تعجبك:-
السنافر (كارتون قديم اللى لونهم لبنى – والعدو بتاعهم اسمه شرحبيل)
إبراهيم الأبيض (دخل على منطقة كاملة وضرب الناس اللى فيها – قلبه ميت)
لازم تشوف كليب (بتاع حسن شحات –ميدو – أمم إفريقية 2006 – لما طلعه ونزل عمرو زكى).