العجوز

فى الوقت ده كان همى جبال
حلم كمان قاللى محال
و كنت ماشى فى ليل عالبحر
و شفت هناك وفوق الصخر
ضل وكان تمام مرسوم
فرس جنبه أمير مهزوم!
خفت دقايق واتهزيت
إنما رحت هناك ولقيت
عود لو غنى
مش راح يشجى إلا بقولة بس الآه
جنبه عجوز
بيحدف غضب الموج بحصاه
حس بصوت الخطوة لمحنى
لمحت فى عينه توأم حزنى
بص لتحت و دارى عنيه
هزيت كتفى يعنى وليه؟
قاللى: أنا عشت العمر لقيته
فجأة واقف أنا فى نهايته
وأنا معرفش إن كنت بديته
ولا خطفنى قبل نهايته
ولا ندهنى الحلم.. سرقنى
ورحت معاه
فجأة لقيتنى
عجوز بيحدف غضب الموج بحصاه
***********************
وصلت السما شقيت البحر
هزمت جيوش الخوف والشر
عملت جناح ولسان للكلمة
زرعت فى قلب الصخر الحكمة
و كنت الحارس لا أنا فارس
جنبى أميرة بلادى كتيرة
عشقت بنات صبايا الحور
غزلت الهوا بستان من نور
يمكن أكون حكمت الكون
صحيت لقيتى لا أنا فرعون
ولا موسى الضارب بعصاه
لقيتنى عجوز
بيحدف غضب الموج بحصاه
***********************
قلتله: طب ما دمت صحيت
أبدأ
لسه لعمرك باقى
اتبسم بشفايف حسرة
خريف العمر مافيهش بواقى
هزيت راسى ولسة هاكمل
دير وشه بقولة: ارحل
و مشيت حاسس إن أنا قدامى
باتكلم وأسمع فى كلامى
خفت فى يوم أبقى أنا هو
مكسور خايف فكرة بكرة
وفى وسط الخوف بصيت فوق
وشفت الشمس فى وقت شروق
حسيت كأن النور بيقوللى
احلم دايما بس تملى
خطى فى جوة الحلم خطاوى
و إياك تسرح ويا غناوى
ضحكت يمكن ولا بكيت
بس بفرحة فى قلبى جريت
قدامى نور الشمس بيوعد
ورايا كان فى ضل بيبعد
ضل كأن الموج ده رماه
ضل عجوز
بيحدف غضب الموج بحصاه