من غير زعل

فى الماضى كانت تُقدَّر شخصية الناس بالعلم، وعلى رأى الزعيم عادل إمام كانت بلدنا (بلد بتاعة شهادات صحيح)، ولكن وآه من كلمة لكن أصبحت بلدنا بلد (وسايط) غلب فيها الجنيه الكارنيه.
يعنى لو مثلا رايح تتعين فى شغلانة محترمة لازم تجيب كارت من (الفولانى) بيه عشان تديه (للعلانى) باشا وتشتغل بقدرة قادر، ولو كنت غير كفء اطمن طالما جايب واسطة هتتقبل، وساعات ساعات يكون متقدم معاك شباب زى الورد وكفاءة إيه وذكاء إيه لكن تتقبل أنت وهما لا، عشان جنابك معاك الواسطة.
حقا إنها بلد الوسايط يعنى لو اتقبض على مواطن غلبان مطحون مكوى بنار الأسعار و طالع عينه م الأزمة العالمية وجيوبه اشتكت م الدروس الخصوصية تلاقى الجرايد كاتبه اسمه بالبنط العريض وهاتك يا عناوين زى: المجرم الذى أرعب الناس وقتل الإحساس.. إلى غير ذلك.
وتلاقى التنديد باسمه وأسرته وكل إللى يشدد له، لكن تعالى بقى لو كان صاحبنا فى الحكاية ممثل ولا ممثلة ولا لعيب كورة ولا ابن شخصية مرموقة ولا مطرب أو مطربة واتقبض بقى على حد فيهم يقولك ف الجورنال الممثلة المشهورة ضبطت فى شقة مشبوهة والمدير المحترم بدد العهدة وخان الأمانة، والقبض على مطرب فى حالة سكر شديد، وبلاوى تانية كتيرة.. طب لما سيادته وسيادتها حالتهم منيلة بنيلة كده وأصبحوا فى وضع شبهة، يبقى ليه منقولش اسمها ولا اسمه فى الخبر؟
حتى نحترس منهم بدل ما إحنا شايفين العيال مهووسين بنجم زى نجم الجير وبقمصانه و كرافتة الجنان بتاعه، وقميصه إللى يهوس وفى الأصل كان هربان من الخدمة العسكرية ولا إحنا يعنى بنصدَّر للغلابة.. ماحنا كلنا ولاد تسعة برضه، دلوقتى واحد منكم ولا واحدة منكن هيقولولى طب ما يمكن هما ولاد 7 شهور.. طبعا أنا بقى بالفقاقة هرد عليهم وأقول أصلهم دخلوه حضَّانة شهرين يبقى ابن تسعة برضه.
خلاص حاضر من عنيا بلاش كلنا ولاد تسعة ماحنا فى الآخر ولاد حوا وآدم طبعا محدش يقدر ينكر ده، لكن هنعمل إيه والواسطة بقت فى كل مكان، رايح تطلع رخصة لعربيتك لازم تكون معاك الواسطة وإلا..
عايز تنجح و تجيب مجموع لازم تدخل درس خصوصى يا حبيبى عشان أعمال السنة وإلا..
عايز تكسب المزاد ويرسى عليك لازم تكون متريش و(معرَّقْ) حبايبك وإلا..
فكرت تدخل السيما فى يوم و معاك التذاكر إللى أنت دافع حقهم لازم تعمل بمبدأ مساء الخير وإلا..
داخل تعمل كشف فى مستشفى يبقى حظك من السما لو تعرف حد من التمرجية وإلا.. وغيره وغيره.
المشكلة إن إحنا مصريين والفراعنة كمان كانوا مصريين.. بس كانت الدنيا وقتها قايمة على التقدم والازدهار بعيدا عن الوسايط، ولكن الآن انظروا تجد الواسطة ماشية.. وساعات بيدلعوها ويقولوا عليها كوسة.. ونادر جدا لما تلاقى حد ينقح عليه ضميره ويراعى غيره ويبعد عن الواسطة.. وساعتها الناس تسميهم عالم (خنيقة) عشان بيكرهوا الواسطة.. ومش بيفتحوا دماغهم لكن هنعمل إيه؟
الضوء يأتى من وميض ضعيف حتى يصبح شعاع نور وأمل ونحن فى انتظار ضوء الأمل للقضاء على وباء الواسطة.