رباعيات

هو أنت ليه يا بخت معاند معايا تَمللى
وإن جيت يوم تراضينى تدينى بالميلى
هو أنت زعلان منى ؟ لو كنت زعلان قولى
أصل أنت كده يابخت ديما للواطى تعلى .
أنا لما بحب، بحب من قلبى
وعمرى ما بلعب بحد وبخلص فى حبى
وديما باكون إيجابى وعمرى ماكون سلبى
ولو يوم سيبت حبيبى رح أسيبه من غُلبى .
إوعاك تتمسك بالدنيا دا الدنيا مِنفاته
وكل واحد فينا هتطلع شهادة بوفاته
فين أبوه وأمه فين حماه وحماته
وأوعاكوا حد يندم على أى شىء فاته .
الواطى هيفضل واطى مهما كِبر وعِلى
عشان معدنه رخيص وعمره ما يوم غِلى
ديما حاسس بنقص مهما زمانه حِلى
قلبه مليان بالحقد على طول وعمره ما خِلى .
أنا عمرى ما أكل حرام
وإن شالله من الجوع أموت
رح أموت موتة كرام
ويحرم عليا القوت .
القلب خلاص مل
وزهقت م الدنيا
دا كل شىء إختل
ونفسى فى حياة تانية .
الواطى هيفضل واطى
وعمره ما بيتغير
لو عايز حاجة يطاطى
ويفضل فى نظرنا صغير.