راقصة للمعلم هريدي: "الرجالة فصلوا شحن يا حبيبي" !

كان محرر «هريدي نيوز» قاعد في حاله وبيكتب له خبرين وفجأة سمع أصوات غريبة تحت العمارة.. وفي ثانية كان في الشارع.
مظاهرة كبيرة ناعمة وطرية وزي المهلبية وكلها حنية.. رقاصات كتييير بالصاجات والشمعدانات بيهتفوا «جاتوه.. حرية.. تحيا المهلبية».. المحرر قعد يضحك وقال لواحدة منهن: إيه حكاية الشعار بتاعكم ده.. قالت له وهي بترقص على واحدة ونص: شوف يا عنيا.. الفقرا يقولوا «عيش.. حرية.. عدالة اجتماعية».. وإحنا أغنيا نقول «جاتوه.. حرية.. تحيا المهلبية».. الرجالة سمعوا كلام محلب وما دخلوش فيلم «حلاوة روح».. ولا بيدخلوا الملاهي الليلية.. إيه اللي حصل لهم.. باين عليهم فصلوا شحن يا حبيبي!