أبو طقة: ماحبكش وإنت كده!

واحد بخيل قوي قعد مع أبو طقة وقال له: إيه أكتر مثل إنت معجب بيه ؟
وعلي الفور قال أبو طقة: هين قرشك ولا تهين نفسك..
البخيل اتنرفز وقال لأبو طقة: المثل مش كده يا عمنا..المثل بيقول هين نفسك ولا تهين قرشك..يعني الواحد عشان يكنز الفلوس لازم يعمل خده مداس للناس..وإيه يعني لما مديرك يلزقك على قفاك ولا يضربك شلوت..ولا شتمك بالغاليين عندك..الشتيمة بتلف تلف وترجع لصاحبها..والمسامح كريم.
الدم غلي في عروق أبو طقة وقال: البني آدم إيه غير كرامته..واللي يحاول يشتمني أضربه وأكسر له قرعته..فيه ناس بتبيع أعز الناس عشان الفلوس..وبتزيح أصحاب الفضل عليهم عشان علاوة ولا ترقية..وفيه ناس يتنفذ طلبات المدير حتى لو هان كرامة اللي خلفوه..ودول كلهم حثالة لإنهم متعودين يعضوا الإيد اللي اتمدت لهم وهايعضوا إيد مديرهم برضه لأن طبعهم كده..م الآخر يا بخيل..ماحبكش وإنت كده..ولا عايز أعرفك من أساسه..سلام ياللي كنت صاحبي.