«أبو عرايس»: «البرنامج» صناعة يهودية و«شيكو» وراء إسقاط «الطائرة العسكرية»

قال سامح أبو عرايس، المحلل المالي، المنسق السابق لحملة عمر سليمان رئيسا، إن برنامج «البرنامج» الذي يقدمه الإعلامي الساخر باسم يوسف «صناعة يهودية».
وكتب «أبو عرايس»، عبر صفحته الشخصية على موقع التواصل الاجتماعي «فيس بوك»، مساء الجمعة: «المقدمة الجديدة لبرنامج باسم يوسف على قناة (إم بي سي) اللي بتجيب صور سينما راديو خلفيتها الموسيقية هي موسيقى (الكليزمر) اليهودية وهي موسيقى يهود وسط وشرق أوربا.. أعتقد الرسالة واضحة».
وأضاف: «فريق كايروكي اللي بيلمعه باسم يوسف هو من الفرق اللي بيصرف عليهم الصهاينة في مصر زيهم زي باسم يوسف والمجموعة بتاعته اللي منهم المسئول عن الدمية (فاهيتا) اللي بيرسل من خلالها شفرات للإرهابيين، ومنهم كمان الثلاث ممثلين شيكو والاثنين اللي معاه اللي عملوا فيلم اسمه (الحرب العالمية الثالثة) على البوستر بتاعه (هليكوبتر تنفجر) في إشارة لإسقاط الهليكوبتر في سيناء، واللي منهم المنتج محمد حفظي بتاع شركة فيلم (كلينيك) اللي شعارها العين الواحدة، وبينتج للممثلين دول واللي منهم المخرج والمؤلف عمرو سلامة وغيرهم من الممثلين والمطربين في مصر اللي بيصرف عليهم الصهاينة».