الخابور في الدستور !

عاشور أبو دقن دافعا باب الغرزة الخوصى بقدمه وجالسا على أقرب مصطبة ومخاطبا صبي الغرزة بلهجة آمرة يملؤها الحنق والغضب:
رصلي حجرين وصاية ياد يا صنقر.. حسبي الله ونعم الوكيل فيك انت واللي مشغلينك وفي الحكومة الفاسقة الماجنة الكافرة.. ربنا يجعل مثواكم جميعا جهنم تصلونها وبئس المصير..
يلتف حوله رواد الغرزة من أعيان البلد وسناكيحها متسائلين عن سر عودة عاشور أبو دقن لغرزتهم التي كان يراها رجسا من عمل الشيطان، وأن كل من دخلها فهو من أصحاب السعير، فما بالك بمن يتبادلون التماسي بها مع الحجارة المحشية..
وبادره الحاج أبو هرجة قائلا: ده دي ده دي.. دا لازم القيامة قامت برة واحنا مش دارينين يا ولاد.. الحاج الشيخ عاشور أبو دقن الراجل البركة اللي ما بيفوتش فرض في الجامع.. واللي بيخرج كل أسبوع في سبيل الله لهداية العصاة والمذنبين.. يسيب دا كله ويشرفنا في غرزتنا اللي بتودي النار... لأ وكمان طالب حجرين وصاية.. أما صحيح دي حاجة تجنّ أجدعها دماغ شاربة حجارة بالقرش كله !
عاشور أبو دقن متفاديًا سخريتهم المريرة: الحكاية مش في أنا دلوقت ولا فيكم انتم.. إحنا إن كنا بنعصي ربنا فبكرة ربنا يهدينا ويتوب علينا.. الحكاية أكبر من كده بكتير.. دي خيّة كبيرة ومنصوبة لنا.. خابور متين وكلنا هاناخده..
المعلم أبو شوال وقد وضع الجوزة جانبا: خيّة كبيرة.. خابور متين.. أنا قلبي كان حاسس إن في نصيبة كبيرة بتدبر لنا.. أصل عاشور أبو دقن ما يسيبش الجامع وييجي الغرزة ويطلب حجرين وصاية ومحشيين كمان إلا لما تكون القيامة قامت.. دا ماعملهاش لما شالوا مرسي ولما قبضوا على الجدع المرشد العام بتاعهم ورجالته.. قول يا عاشور ربنا ينجيك وينجينا.. قول بسرعة يا شيخ وقعت قلبي...
عاشور باستياء بالغ: ميت مرة قلت لك يا عم أبو شوال أنا مش إخوان أنا تكفير وهجرة !
فوزي أمين المخازن بالجمعية الزراعية متهكما: يا سلام.. غلطنا في البخاري.. يعني اقتصاد وعلوم سياسية يا خيّ.. ما أسخم من ستي إلا سيدي.. سايبنا تايهين زي العيال في المولد... وبتتخانق ع التنظيمات وأسمائها !
عاشور مكملا حديثه: ربنا يسامحك يا فوزي يا بني.. بقى يا جماعة انتم قاعدين هنا والجماعة اللي في مصر عمالين يقلوظلكوا الخابور في موضوع الدستور.. وانتم عمالين تتصطلوا هنا ولا على بالكم.. وتشدوا في أنفاس وتكركعوا والحبل يوماتي بيضيق نحون رقابيكم يوم عن يوم..
عوضين كلاف البهايم ضاحكا: يا حاج عاشور.. بقى حتة الورقة اللي بيعملوها في مصر واللي كل شوية يطلع الراجل الأقرع والست البيضة القشطة اللي جنبه يتكلموا عنها.. مع إني شايف إنها مالهاش أيتها لأزمة.. والعالم دي واجعة قلوبها ع الفاضي.. بقى حتة الورقة دي هي اللي هاتودينا في داهية.. إزاي بقى يا فصيح.. قول يا بركة.. آهو منكم نستفيد برضه !
عاشور وقد بدأ يفقد أعصابه: ماهم العالم البقر اللي زيك هم اللي موديّنا في داهية.. شوفوا يا جماعة.. دول عايزين يضيفوا والعياذ بالله كلمة "دولة مدنية" للدستور.. شفتوا بقى المصيبة.. عرفتوا حجم الكارثة.. انتوا عارفين يعني إيه مدنية ؟
يبادره عوضين بقوله: أيوه طبعا عارفين يعني إيه مدنية.. انت فاكرنا بهايم ولا إيه.. مدنية يعني فيها مدنية ومعمار.. يعني هايعمروا مصر بدل الخراب اللي فاته مبارك ومرسي.. داهية لا ترجعهم..
لا ينتظر عاشور بقية الآراء ويبادر بقوله: مدنية دي والعياذ بالله نسبة إلى أهل مدين.. ودول هم قوم نبي الله شعيب.. وربنا غضب عليهم عشان كانوا بيظلموا في المكيال والميزان ويبخسوا الناس أشياءهم ويعثوا في الأرض مفسدين.. قوم ربنا عاقبهم بعذاب يوم الظلة وأخذهم أخذ عزيز مقتدر..
قوم العالم الكفرة اللي في لجنة الدستور عايزين يقلدوا العالم المجرمين دول.. وهو احنا ناقصين..ما التجار بيغشوا في الموازين والمكاييل ويبيعوا بالغلا والكوى لوحديهم مش محتاجين نطلع لهم بيها دستور.. وياريتها تيجي على قد كده وبس يا حبايب.. دي كلمة مدنية دي أصل كل شر ومنبع كل سوء.. ومعناها إضافة للي قولته لكم الحرب على جميع الأديان ودين الإسلام بالذات..
فلا يعملون حكم الله في أي شيء من مصالح الناس ولا يلتزموا بأوامر الله ولا ينتهوا عن نواهيه.. ويبقى الدين محصورا في الجوامع.. دا إذا فضل لسه فيه جوامع وما حولوهاش لخمارات ومراقص والعياذ بالله.. مدنية بقى.. وتبقى النساوين تمشي على حل شعرها ويقلعوا ملط في الشوارع ولا حول ولا قوة إلا بالله.. وتيجي تكلم بنتك تقولها اتعدلي يا بت... تبوق فيك وتجيب لك الحكومة البيت ياخدوك من قفاك ع التخشيبة.. شفتوا بقى البلاوي اللي انتوا داخلين عليها يا بلد !
يزوم الجميع ويحوقلون ويسترجعون.. فيدرك عاشور أبو دقن أنه وصل إلى غرضه وغبّاهم بما فيه الكفاية.. وأنهم ضمن نواة المظاهرة التي ستنطلق مؤيدة لعودة الشرعية ورفض الانقلاب الجمعة القادمة..
وحتى يتأكد عاشور أنه قد أحكم ربط العمة على رءوسهم تماما أكمل حديثه قائلا:
لا.. وفيه داهية أكبر ونصيبة أتقل.. دول عايزين يغيروا المادة الثالثة كمان ويقولوا فيها إعمال شرائع غير المسلمين بس من غير كلمة المسيحيين واليهود.. وهي دي الأديان السماوية اللي ربنا انزلها.. يعني بكرة يجولك البهائيين ويقولوا عايزين مساجد خاصة بينا، وعبدة الشيطان يقولوا عايزين معابد لينا.. وبكرة تستجد أديان تبيح زواج الابن من أمه والبنت من أبوها ولا تقدروا تتكلموا ولا تفتحوا بقكم يا بلد.. انتوا تروحوا تلبسوا طرح أحسن..
وتستعدوا لعذاب زي عذاب أهل مدين يا بتوع المدنية.. حسبي الله ونعم الوكيل في كل من رضي بذلك أو سكت عنه.. وبينما هم في أخذ ورد إذ دخل عليهم الدكتور رشاد عويس أستاذ الفلسفة ليضرب حجرين يعمر بهما رأسه ليصيح المعلم أبو شوال في كل من في الغرزة:
بس يا جدع انت وهو.. الدكتور رشاد عويس ابن بلدنا المتعلم المتنور جه وهايعرفنا الصح من الغلط.. قال يا دكتور احنا رايحين في داهية.. وواخدين خابور جامد في موضوع الدستور اللي بيعملوه في مصر ده ؟!
وأخذ الحاضرون يشرحون له ما قاله الشيخ عاشور أبو دقن والبلاوي الزرقا اللي مستنية البلد وعذاب ربنا اللي هاينزل على مصر والبلاد اللي نحوها أول ما المصريين يوافقوا على الدستور الكافر المنيل ده على طول..
ضحك الدكتور رشاد عويس حتى استلقى على قفاه قائلا: بس يا واد يا سنقر ما تجيبش الجوزة يا ابني.. أنا كنت جاي أضرب حجرين أعدل بيهم دماغي... بس خلاص الجماعة قاموا بالواجب وزيادة..هههههههه دا صنف مفتخر قوي هههههه...
المعلم أبو شوال متضايقا ومعاتبا الدكتور رشاد: بقى البلد تبقى رايحة في داهية وانت عمال تضحك وتتريق علينا يا دكتور رشاد يا بني ؟!
الدكتور رشاد ومازالت نوبات الضحكك تتملكه: والله ما قصدي يابا الحاج أبو شوال.. بس أصل اللي قال لكم الكلام ده وحاول يقنعكم بيه هو اللي كان عايز يزبط لكم العمة صح.. كلمة مدنية دي معناها دولة القانون التي لا يستبد فيها أي حاكم.. ولا تعلو فيها أي سلطة فوق القانون.. والتي لا يحكمها رجال الدين.. كما لا تحكمها المؤسسة العسكرية.. وهى دي الدولة المدنية التي نحلم بها.. كما أن الثورة في 25 يناير و30 يونيو أكدت على ذلك.. ولابد أن يشعر جميع المواطنين بأنهم متساوون أمام القانون ولا يوجد فروق بينهم بسبب الدين أو الفقر أو الإعاقة أو أي سبب آخر.. كما أن مدنية الدولة تعنى استقلال القضاء وخضوع الدولة وسلطاتها للقانون وحقوق المواطنة وحريات المواطنين..
أما موضوع المادة الثالثة فدي ما فيهاش مشكلة.. لأن غير المسلمين المقصودين في الدستور هم الموجودون والمعترف بيهم وقت عمله وما يستجد مالوش أصل.. وإن كنت شايف أن حق الإيمان بأي شيء مكفول لكل بني آدم من فوق سبع سماوات "من شاء فليؤمن ومن شاء فليكفر".. وربنا هو اللي هايحاسب الجميع.. مش أحسن ما ييجي واحد بهائي يخطب بنتك واسمه محمد حسن على ومكتوب في بطاقته مسلم عشان احنا ما بنعترفش بأديان تانية ويطلعوا أحفادك كفار والعياذ بالله.. يا جماعة أحسن لنا نصارح نفسنا ومجتمعنا بانتماءاتنا بدل ما نلبس بعدين في حيطة.. والقانون ينظم إيه الصح وإيه الغلط والكل يخضع ليه.. مش كدة ولا إيه ؟
المعلم أبو شوال: والله عين العقل يا دكتور.. الله.. إومال عاشور أبو دقن راح فين يا جماعة؟
عوضين ممسكا بطنه من كثرة الضحك: أنا شوفته من شوية بيتسحب ناحية باب الغرزة.. وخد ديله في سنانه وطار !